Մեր կրթօջախում՝ «Հերացի» ավագ դպրոցում, մի բարի ավանդույթ կա. դպրոցական արձակուրդի օրերին սովորող­ներն այցելում են տարբեր կազմակերպություններ, ծանոթանում նրանց գործառույթնե­րին, իրականացնում կամավորական գործունեություն։ Այս նախաձեռնությունը, որի հեղինակն, ի դեպ, մեր դպրոցի տնօրեն Ն. Սարգսյանն է, մեծապես նպաստում է աշա­կերտներիս մասնագիտական կողմնորոշմանը, քաղաքացիական ակտիվ դիրքո­րոշման ձևավորմանը։ Ի թիվս մեր դասարանի մյուս աշակերտների՝ ինձ բախտ վիճակվեց այ­ցելելու  Սփյուռքի նախարարություն, հանդիպել նախարարարության աշխատակից­ների և անձամբ նախարար տիկին Հակոբյանի հետ,  լսել «Հայաստան-Սփյուռք» գործակ­ցության ուղղությամբ կատարված աշխատանքների մասին և լուսանկարվել տիկին նախարարի հետ։ Ես հասկացա, որ Հայաստանն ու Սփյուռքը իսկապես միասին են, և այս հարցում մեծ է նաև նախարարության դերը։ Իսկ երբ մասնակցեցի Ղա­զախստանի Պավլոդարի մարզի «Հայրենիք»  հայկական ազգամշակութային միավոր­ման հետ կազմակերպված տեսաժողովին, որի ընթացքում քննարկվեցին հայապահ­պանությանն առնչվող բազմաթիվ ծրագրեր, մի տեսակ թեթևություն իջավ սրտիս. ես հասկացա, որ հայրենիքից հեռու էլ մեր հայրենակիցները չեն կորցրել իրենց ազգային դիմագիծը, հավատարիմ են մնացել հայկական ինքնությանը, ավանդույթներին և այժմ լուրջ ձեռնարկներ են իրականացնում այդ ամենը պահելու ու պահպանելու համար։ Ես մեծ ոգևորությամբ լսեցի հայրենաճանաչության ամենամյա ծրագրերի, փառատոների, ամենատարբեր միջոցառումների մասին, որոնց հասցեատերը հիմնականում երիտասար­դությունն է։ Հենց այդ պահին էլ ես և ընկերներս որոշեցինք բարեկամանալ

Պավլոդարի մարզի «Հայրենիք»  ՀՄԿ-ի կիրակնօրյա դպրոցի սաների հետ և որպես առաջին քայլ՝  խոստացանք նրանց ուղարկել 2017 թ. ՍՆ «Մեր մեծերը» ծրագրում ընդգրկված  Մխիթարյան միաբանության վերաբերյալ մեր կողմից պատրաստած տեղե­կատվական նյութերի փաթեթը՝ Սուրբ Ղազար կղզում Մխիթարյան միաբանության հաստատման 300-ամյակին նվիրված միջոցառումներ կազմակերպելու համար։

Նախարարությունից հեռացանք ոգևորված և հայրենասիրական նոր լիցքեր ստացած։ Հպարտ էինք, որ աշխարհի բոլոր ծայրերում ապրող մեր հայրենակիցները հավաքվել են իրենց հայրենիքի՝ Հայաստանի Հանրապետության շուրջը և համատեղ փորձում են հզորացնել այն։ Իսկ տիկին նախարարի հետ մեր լուսանկարը դեռ երկար կջերմացնի մեզ բոլորիս։

  Հայրապետյան Էրիկ

ԵՐԲՀ «Հերացի» ավագ դպրոցի 10⁹  դասարանի աշակերտ