Սեպտեմբերի 13-ի երեկոյան Թեհրանի Հայ մարզամշակութային «Րաֆֆի» համալիրի «Սայաթ Նովա» սրահում տեղի ունեցավ «Իրանահայ համայնքի ամբողջական պատմությունը» գրքի շնորհանդեսը, որի հեղինակն է գիտահետազոտող, հասարակական ու մշակությային ակտիվիստ դոկտ. Էդիկ Բաղդասարյանը՝ Է. Գերմանիկ:

Ինչպես «Հայերն այսօր»-ին հայտնում են Միությունից, միջոցառումը սկսվեց Համալիրի երգչախմբի՝ «Հայ Մեր»-ի կատարմամբ, որից հետո Համալիրի նախագահ Վիգեն Մանդանին հանդես եկավ բարի գալստյան ու ողջյունի խոսքով: Այնուհետև միջոցառումն անցկացնելու նպատակով նա բեմ հրավիրեց Համալիրի փոխնախագահ Ռուբիկ Սարդարյանին և գրքի հեղինակ Էդիկ Բաղդասարյանին:

Դոկտ. Ռ. Սարդարյանը դրվագներ պատմեց Դոկտ. Է. Գերմանիկի կյանքից ու աշխատանքներից: Նա նշեց, որ Է. Գերմանիկի առաջին գիրքը եղել է «Հայաստանի պատմություն» գրքի թարգմանությունը՝ երկու հատորով, որը մեծ խանդավառություն առաջացրեց իրանահայության մեջ՝ ներկայացնելով Սովետական  Հայաստանի հայտնի պատմաբանների գրքի թարգմանությունը պարսկերեն: Ռ. Սարդարյանը տեղեկացրեց, որ շահի օրոք Է. Գերմանիկը իր տարրական ուսումը ստացել է Հեշմաթիե թաղամասի «Խորենի» դպրոցում, որի տնօրենը առաջադիմական մարդ է եղել և իր դրական ազդեցությունն է թողել բազմաթիվ մարդկանց վրա՝ այդ թվում նաև Էդիկ Բաղդասարայանի: Է. Բաղդասարյանի համար մեծ աղբյուր է հանդիսացել Ս. Աստվածածին եկեղեցու դիմացի հայկական «Սաքո» գրախանութը, որը կարողանում էր շահի բռնապետության օրոք Սովետական Հայաստանի գրականությունը ներմուծել Իրան և ծանոթացնել իրանահայ մտավորականներին Սովետական Հայաստանի գիտնականների մոտեցումների և ընդհանրապես երկրի անցուդարձերի հետ:

Այնուհետև ցուցադրվեց 15 րոպեանոց մի տեսաժապավեն, որտեղ Է. Գերմանիկը ներկայացնում էր իր հրատարակած ու թարգմանած գրքերը, որոնց ընդհանուր քանակը 138-ն է՝ 98-ը պատմական, մշակութային, Հայոց ցեղասպանության մասին ու հասարակական բնույթ ունեցող գրքեր են, իսկ մյուսները՝ տեխնիկական ու ավելի շուտ համակարգչին վերաբերող:

Արտահայտվեց նաև գրքերի հեղինակ Է. Բաղդասարյանը: Նա նշեց իր աշխատանքային պայմանների ու տարբեր ժամանակների հարցերի, ինչպես նաև տարբեր երևույթների նկատմամբ իր վերաբերմունքի մասին: Ընդգծեց այն դրդապատճառները, որոնք իրեն մղեցին այդ քանակությամբ գրքեր հրատարակելու: Նա խոսեց նաև ապագայի ծրագրերի մասին: Ապրելով Կանադայի Տորոնտո քաղաքում և ունենալով որոշակի հնարավորություններ՝ ծրագրել է անգլերեն, հայերեն ու պարսկերեն պատրաստել մի շարք աշխատություններ:

Գեղարվեստական բաժնում համալիրի երգչախումբը՝ գեղարվեստական ղեկավար Համլետ Խաչատրյանի գլխավորությամբ կատարեց երեք երգ: Իր գեղեցիկ ասմունքով ներկայացավ համալիրի մշակութային բաժանմունքի պատասխանատուներից Մագդինե Մինասյանը:

Վերջում օրվա առթիվ արտահայտվեց Իրանում ՀՀ արտակարգ և լիազոր դեսպան Պրն. Արտաշես Թումանյանը: Նա բարձր գնահատեց Է. Բաղդասարյանի կողմից կատարված աշխատանքները և անկեղծորեն խոստովանեց, որ տեղյակ չի եղել նման աշխատությունների մասին: Նա իր խրախուսանքի խոսքը ուղղեց համալիրին և իրանահայ համայնքին: