ՀՀ սփյուռքի նախարարության «Հայերն այսօր» էլեկտրոնային պարբերականում իրենց ուսումնական փորձառությունն անցկացնող երևանյան բուհերի ուսանողներն ակտիվորեն մասնակցում են նախարարության ծրագրերի լուսաբանմանը: Նրանցից շատերի համար լրագրողական առաջին քայլերն սկսվում են հենց Սփյուռքի նախարարությունից. «Հայերն այսօր»-ն այս առումով մկրտության յուրօրինակ ավազան է դառնում: Ստորև մեր ընթերցողների ուշադրությանն ենք ներկայացնում ՄՊՀ-ի երևանյան մասնաճյուղի լեզվաբանության ֆակուլտետի 2-րդ կուրսի ուսանողուհի Էդվիգա Թևոսյանի տպավորություններն իր ուսումնական փորձառության մասին.

– Բազմիցս լսել էի ՀՀ սփյուռքի նախարարության, նրա բազմաթիվ ծրագրերի, հատկապես` «Արի տուն» ծրագրի մասին և մեծ ցանկություն ունեի իմ ուսումնական պրակտիկան անցկացնել հե՛նց այնտեղ:

Ի ուրախություն ինձ` իմ պրակտիկան համընկավ  այն ժամանակաշրջանին, երբ մեկնարկեց «Արի տուն» ծրագիրը, և ես սիրով սկսեցի  հարցազրույցներ անել «Արի տուն» ծրագրի մասնակիցների հետ, որոնցից շատերը գրեթե իմ տարեկիցներն էին: Աշխարհի տարբեր երկրներից այս հրաշալի ծրագրին մասնակցող հայորդիների շուրթերից  Հայրենիքի մասին հնչող հուզիչ բառերն ու արտահայտություններն այնքա՜ն  անկեղծ էին ու սրտառուչ… Ես դեռ այդ օրերի տպավորությունների ազդեցության տակ եմ և չեմ կարծում, թե երբևէ կմոռանամ իմ հարցազրույցների հերոսներին, հայոց լեզվով գրած լրագրողական առաջին փորձերս:

Այս պրակտիկան շատ կարևոր էր ինձ համար… այն օգնեց վերանայել հայերենից ունեցած իմ գիտելիքները: Որոշակի հմտություններ ձեռք բերելու հետ մեկտեղ՝ կատարելագործեցի, զարգացրեցի իմ գիտելիքների շտեմարանը և լրագրողական աշխատանքին բնորոշ որոշակի նորություններ  սովորեցի՝ կապված այդ անչափ հետաքրքիր ոլորտի հետ::

Չեմ կարող  չանդրադառնալ այն ջերմ միջավայրին, որտեղ ես աշխատում էի. մի հրաշք կոլեկտիվ, որն ինձ ընդունեց հարազատի ջերմությամբ, ընձեռեց ինքնադրսևորման բազմաթիվ հնարավորություններ և օգնեց՝ կատարելագործելու իմ գիտելիքները: Առնչվելով «Արի տուն» հայրենաճանաչողական ծրագրին, տեղեկանալով նախարարության բազմաբնույթ և բազմաբովանդակ ծրագրերին՝ ակամայից ցանկացա դառնալ այդ  հետաքրքիր ծրագրերի մասնակիցն ու ականատեսը, դրանք լուսաբանողը: Հուսով եմ, որ բուհն ավարտելուց հետո անպայման կփորձեմ դառնալ հայկական լրատվադաշտի մի մասնիկը:

Շնորհակալ եմ «Հայերն այսօր»–ի բարեհամբույր բոլոր աշխատակիցներին:

Նաև շնորհակալ եմ ՄՊՀ երևանյան մասնաճյուղին, որը հնարավորություն ընձեռեց իմ ուսումնական պրակտիկան անցնելու հե՛նց ՀՀ սփյուռքի նախարարությունում: