Հեռուստամարաթոն 2013-ի շրջագծում հինգշաբթի, նոյեմբերի 28-ին« Նոր Ջուղայի Հայ Մ. Մ. “Արարատ” միութեան սրահում, շրջանի Հայ դատի յանձնախմբի նախաձեռնութեամբ եւ “Ռուբէն” Երիտ. միութեան կազմակերպութեամբ տեղի ունեցաւ  դրամահաւաք, որի ընթացքում հանգանակւած գումարները նպատակաուղղւած են լինելու  Վարդենիս-Մարտակերտ Ճանապարհաշինութեանը:

      “Դէպի Արցախ” նշանաբանի ներքոյ  իրականացւած դրամահաւաքին իրենց   սրտաբուխ նւիրատւութեամբ մասնակցեցին Սպահանի հայոց թեմի առաջնորդ Տ. Բաբգէն եպիսկոպոս Չարեանը, ազգային  մարմինները, միութիւնները, հայոց ազգային դպրոցները եւ ժողովուրդը:

      Նշելի է, որ  սկսեալ 2003 թւականից (ամենամեայ կարգով), «Հայաստան» Համահայկական հիմնադրամի հեռուստամարաթոնին զուգահեռ, Նոր Ջուղայում եւս  տեղի է ունեցել  դրամահաւաք:

Ըստ  www.panorama.am-ի՝  նոյն օրը Թեհրանում ՀՀ դեսպանութիւնում տեղի է ունեցել «Հայաստան» համահայկական հիմնադրամի կողմից կազմակերպւած «Հեռուստամարաթոն-2013» ծրագրի մեկնարկի արարարողութիւն, որին  ներկայ են եղել Թեհրանի Հայոց թեմի  առաջնորդ Տ. Սեպուհ արքեպիսկոպոս Սարգսեանը, ԻԻՀ-ում ՀՀ դեսպան Գրիգոր Առաքելեանը, իրանահայ  բարերարներ եւ  հիւրեր:

Այս տարի   հանգանակւած գումարը  գերազանցել է նախորդ տարիներին:

Երանուշ Թահմազեան

Իրան –Նոր Ջուղա

Լուսանկար՝ Վէրգինէ Միրզախանեանի