Մարտի 25 ին Ամմանի «Սալուս» ճաշարանում 100 մայրերի ներկայությամբ տոնվեց «Մայրերի օրը»՝  կազմակերպությամբ Ազգային մարզական միության տիկնանց հանձնախմբի:

Ինչպես «Հայերն այսօր»-ին հայտնում են կազմակերպիչները, բացման խոսքով հանդես եկավ Լաուրա Հովհաննիսյանը՝ Հայաստանից ժամանած ուսուցչուհի, որը աշխատում է հայկական դպրոցում: Նա իր խոսքում ընդգծեց հայ կնոջ և մոր դերակատարությունը պատմության ընթացքում, արհավիրքի տարիներին: Կարևորեց հայ մայրերի դերը  մեր օրերում և նրանց ջանքերը, որպեսզի աշխարհի բոլոր անկյուններում մեր սերունդը հայ մնա: Բանախոսը ավարտեց ելույթն իր ակրոստիքոս բանաստեղծությամբ.

Միակ էակն է այս աշխարհում,

Արարչից հետո նոր կյանք է ծնում:

Յուրովի է նա աշխարհը սիրում,

Րոպեներն անգամ թանկ է համարում,

Իր զավակի ու ընտանիքի գրկում:

Կնվիրվի նրանց առանց մնացորդի և նրա սերը աշխարհն է փրկում …

Արաբերեն լեզվով շնորհավորանքի խոսքեր հղեց տիկին Էլիզաբեթ Վարդանյանը: Այնուհետև գեղեցիկ ձայնով մեներգեց Վարդուհի Թորոյան-Ներսեսյանը՝ գովերգելով գարունը և մայրական սերը: «Սպիտակ» պարախմբի մենապարուհի Լիլիթ Մելքոնյանը  կատարեց «Հենզելին», որին հաջորդեց պարախմբի ելույթը:

Միջոցառումն ընդմիջվեց հայկական նախաճաշով: Ապա բեմը տրամադրվեց Սյուզի Սանջյանին, որը մեծ խանդավառությամբ ասմունքեց Մարո Մարգարյանի «Խոսք մոր համար» բանաստեղծությունը.

Կանգնի´ր այդպես.

Կանգնի´ր այդպես,

Ամեն տեսակ մոռացութեան ,մերժումի դեմ,

Կանգնի´ր այդպես…

Այնուհետև հետաքրքիր հարցադրումներով Սյուզին  վեր հանեց կնոջ և մոր՝ գարնան պես ծնունդ տվող կերպարը: Ելույթի  վերջում կատարվեց Ավետիք Իսահակյանի խոսքերով գրված «Մայրիկիս» մեներգը, որը արժանացավ ներկաների ջերմ ընդունելությանը:

Ապա Լուիզա Աբազյանը անցկացրեց հետաքրքրաշարժ ինտելեկտուալ խաղ՝ հայ նկարիչների կտավների վերաբերյալ: Վերջինս ներկաներին քաջալերեց նաև հոգեբանական հարցադրումներով՝ խանդավառելով  սրահում հավաքվածներին: Վերջում  Վիոլետ Լեփեջյանը  հետաքրքիր հանելուկներով զվարճություն պարգևեց ներկաներին:

Միջոցառումը եզրափակվեց հայկական ուրախ շուրջպարով:

Վարձքը կատար՝ տիկնանց հանձնախմբի անդամներին՝ նվիրյալ աշխատանքի համար: