Հայոց բանակի կազմավորման 25-ամյակի նվիրված իրանահայ Գարնանային 29-րդ խաղերի հանդիսավոր բացումը, ներկայությամբ պաշտոնական հրավիրյալների, մարզական պատվիրակությունների, միութենականների եւ հոծ բազմության, տեղի ունեցավ կիրակի, մարտի 19-ին՝ խաղերը կազմակերպող Նոր Ջուղայի Հայ մարզա-մշակութային «Արարատ» միության մարզասրահում:

Ինչպես «Հայերն այսօր»-ին Նոր Ջուղայից հայտնում է Երանուշ Թահմազյանը, խաղերի խորհրդանշական ջահը վառելու եւ օրհնելու արարողությունը կատարվեց ուրբաթ` մարտի 17-ին, ժամը՝ 12:00-ին` Սուրբ Ամենափրկիչ վանքի շրջաբակում տեղադրված Հայոց ցեղասպանության  սրբադասված նահատակների հիշատակը հավերժացնող հուշարձանի հավերժ բոցկլտացող կրակով, որը ջահակիր խմբի միջոցով փոխադրվեց  միության մարզասրահ:

Խաղերը պաշտոնապես բացված հայտարարեց երեկոյի հանդիսավարուհի` Մանիա Ղուկասյանը, որից հետո միության Սկաուտական միավորի Արի-արենուշական հատվածի ներկայացուցիչների մասնակցությամբ կատարվեց դրոշակի արարողությունը եւ ներկաների հոտնկայս ունկնդրությամբ հնչեց Իրանի Իսլամական Հանրապետության օրհներգը:

Մարզական պատվիրակությունների տողանց-շքերթը կայացավ Հայաստանի Գյումրի քաղաքի եւ իրանահայ երեք թեմերի մարզիկ-մարզուհիների մասնակցությամբ:  Մարզական փառատոնի առթիվ  ողջույնի խոսքով  ելույթ ունեցան Նոր Ջուղայի Հայ Մ. Մ. «Արարատ» միության կենտրոնական վարչության նախագահ Մասիս Մինասյանը, Սպահանի Հայոց թեմի առաջնորդական տեղապահ Տ. Սիփան ծ. վրդ. Քեչեջյանը եւ Իրանի Իսլամական խորհրդարանում Սպահանի եւ Հարավային իրանահայության պատգամավոր Ժորժիկ Աբրահամյանը:

Խաղերի բացման առիթով շնորհավորանք–ուղերձներով մասնակիցներին ողջունել էին նաեւ  Իրանում ՀՀ արտակարգ եւ լիազոր դեսպան Արտաշես Թումանյանը, Թեհրանի Հայոց թեմի առաջնորդ Տ. Սեպուհ արք. Սարգսյանը եւ  Ատրպատականի Հայոց թեմի առաջնորդ Տ. Գրիգոր արք. Չիֆթջյանը:

Ծրագրի ամենասպասված եւ խանդավառությամբ լեցուն պահը ջահակիր խմբի մուտքն էր, որը դահլիճ բերեց խաղերի ջահը, որով բոցավառվեց իրանահայ Գարնանային 29-րդ խաղերի խորհրդանշական կրակը: Այս շրջանի խաղերի   գլխավոր ջահակիր լինելու պատիվը տրված էր մարմնամարզության մարզաճյուղում Իրանում եւ Հայաստանում փայլուն հաջողություններ արձանագրած Մանուկ եւ Մայիս Հովսեփյան եղբայրներին: Ջահակիր խմբի մաս էին կազմում նաեւ շնորհալի բասկետբոլիստուհիներ Մանե Հովսեփյանը եւ Մինելի Ղազարյանը:  Խոհրդանշական  կրակը վառելուց հետո մարզիկների եւ իրավարար կազմի ներկայացուցիչների միջոցով կատարվեց երդման կարգ:

Դահլիճում ստեղծված հուզիչ եւ միաժամանակ խանդավառ ու ուրախությամբ լեցուն պահը առավել խանդավառեցին միության Սկաուտական միավորի միջոցով իրականացված ցուցադրական աշխատանքները եւ Մշակութային միավորի գեղարվեստական հայտագիրը, ինչը սկսվեց Հայոց բանակին նվիրված Նոր Ջուղայի անվանի մարզիկ–մարուհիների մասնակցությամբ պատրաստված «Երազ իմ երկիր» երգեցողության տեսահոլովակով եւ շարունակվեց «Կռունկ» համույթի կրտսեր եւ ավագ պարախմբերի կատարմամբ «Պրեգոմեշ», «Վերվերի» եւ ազգագրական պարերի շարանով:

Ընթացքում  երգերի կատարումներով հանդես եկան  համայնքի սիրված երգիչ Կարեն Օհանյանը եւ Սուրբ Ամենափրկիչ վանքի «Կոմիտաս» երգչախմբի մեներգչուհիներ Վանա Շիրվանյանը եւ Թանիա Մինասյանը, որոնց ընկերակցում էր «Անի» նվագախումբը: Կատարումները ընդմիջվում էին օրվան համահունչ բանաստեղծական կատարումներով` հանդիսավարուհու մատուցմամբ: Գեղարվեստական բաժնի ղեկավարներն էին՝ ասմունքի խմբի պատասխանատու` Ռիմա Սիմոնյան, Կարին Տեր Մարտիրոսյան, պարուսույց՝ Նունե  Մկրտչյան, «Կոմիտաս» երգչախմբի ղեկավար Արմեն Ամիրխանյան եւ նվագախմբի ղեկավար Արին Ղարախանյան: Երեկոն ամփոփվեց  «Մենք ենք մեր սարերը» երգի ոգեշնչող կատարումով:

Մրցությունները կայացան ֆուտբոլ, բասկետբոլ, սեղանի թենիս եւ թեթեւ ատլետիկա մարզաձեւերում:

Գարնանային խաղերի փակումը տեղի  ունեցավ  մարտի 24-ին` մեդալաբաշխման հանդիսությամբ:

Հավելենք, որ հնգօրյա մարզական փառատոնը իրականացավ Նոր Ջուղայի Հայ մարզա-մշակութային «Արարատ» միության կենտրոնական վարչության նախաձեռնությամբ եւ համագործակցությամբ կազմակերպիչ հանձնախմբի, միության մարզական, մշակութային, երեցների, սկաուտական եւ ուսանողական միավորների, կարգապահական կազմի, ֆուտբոլի հանձնախմբի  ու անհատների անշահախնդիր համագործակցությամբ:

Լուսանկարները` Գեւիկ Խաչատրյանի և հեղինակի