Երեկ Արցախում մեծ շուքով նշվել է Գյուղատնտեսության աշխատողի օրը:

«Արցախպրես»-ի թղթակցի հաղորդմամբ` ԼՂՀ գյուղատնտեսության նախարարության նախաձեռնությամբ Ստեփանակերտի Վերածննդի հրապարակում վաղ առավոտյան սկսվել և շարունակվում է արցախյան գյուղատնտեսական մթերքների և արտադրատեսակների նմուշների ցուցահանդես-տոնավաճառ:

Հանրապետության բոլոր տնտեսվարողներին և անհատներին հնարավորություն է ընձեռվել ցուցադրելու և վաճառելու իրենց մթերքն ու արտադրանքը:

Տոնավաճառում ներկայացված բերքն ու բարիքն օրհնել է Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը:

Այնուհետև,  ԼՂՀ  նախագահ Բակո Սահակյանի գլխավորությամբ պաշտոնական պատվիրակությունը շրջել է տոնավաճառի տաղավարներով՝ ծանոթացել վաճառքի հանված գյուղմթերքներին և արտադրատեսակներին։

ԼՂՀ գյուղատնտեսության նախարար Արամ Մխոյանն իր խոսքում ասել է, որ արդեն վեցերորդ տարին է, ինչ համաժողովրդական տոնախմբությամբ Ստեփանակերտում նշվում է գյուղատնտեսության աշխատողի և բերքի տոնը:

«Տոնավաճառին մասնակցում են 600-ից ավելի մասնակիցներ՝նախորդ տարվա 430–ի փոխարեն: Այս տարի գյուղատնտեսության աշխատողի տոնը տարբերվում է նրանով, որ ավելացել է նաև ներկայացվող արցախյան բերք ու բարիքի և գյուղատնտեսական մթերքի տեսականին և քանակը: Տոնը հնարավորություն է տալիս, որ անմիջական շփում ստեղծվի արտադրողի և սպառողի միջև: Ներկայացրել ենք նաև ժամանակակից ոռոգման կաթիլային համակարգով մշակված պտուղներ: Մեր կողմից ֆինանսավորվել են տրանսպորտային բոլոր ծախսերը։ Պայմանավորվածություն է ձեռքբերվել, որպեսզի տնտեսվարողները մթերքները վաճառեն շուկայականից ցածր գներով։ Մեր պայմանավորվածությունը պահպանվել է, ինչի մասին փաստում է նաև ժողովրդի մեծ հոսքը»,- ասել է նախարարը և շնորհավորել գյուղատնտեսությամբ զբաղվողներին մասնագիտական տոնի առթիվ։

Քաշաթաղի շրջանն (54  համայնք) այս տարի տոնավաճառին ներկայացել է 320 ավտոմեքենայով:

Այս մասին մեզ  հետ զրույցում  տեղեկացրել է շրջվարչակազմի ղեկավարի տեղակալ Արտուշ Մխիթարյանը  և   նշել.

«Գյուղատնտեսական տարին նախորդ  տարիների համեմատ բարեհաջող էր, հատկապես հացահատիկային մշակաբույսերի առումով»,- ասել է Ա. Մխիթարյանը և հավելել, որ Քաշաթաղում տարեցտարի ընդլայնվում են նաև բանջարաբոստանային մշակաբույսերի ցանքատարածություններն ու այգիները:

Ընդհանուր առմամբ քաշաթաղցի գյուղացիները գոհ են ընթացիկ տարվա արդյունքներից, որոնց իրացման համար լրացուցիչ հնարավորություն է ընձեռել Գյուղաշխատողի օրվա կապակցությամբ կազմակերպված տոնավաճառը, որն ըստ Ա. Մխիթարյանի, նախ և առաջ վերածվել է ավանդական տոնի:

Բերքի տոնն ուղեկցվում էր Ստեփանակերտի և ՀՀ մշակութային համույթների համատեղ կատարումներով:

Միջոցառմանը ներկա էին նաև  ԼՂՀ ԱԺ նախագահ Աշոտ Ղուլյանը, վարչապետ Արայիկ Հարությունյանը, պաշտոնատար այլ անձինք, զբոսաշրջիկներ, քաղաքացիներ։

Նշենք, որ այս տարվա միջոցառման գլխավոր հովանավորը ՀՀ-ում գործող «ՍՊԱՅԿԱ» սահմանափակ պատասխանատվության ընկերությունն է: