Հարցրեք Արետին Հայաստանի պատմությունից, եւ նա ցույց կտա փոքրիկ պարկը, որ պահում է Hay Ararat բաժակների խանութում, որն արդեն մոտ 30 տարի աշխատեցնում է եղբոր հետ: «Ահա»,- վերջապես ժպտում է նա եւ ցույց տալիս Հայաստանի եւ հարեւան երկրների քարտեզը, որն ասեղնագործված է պարկի վրա, news.am-ի փոխանցմամբ՝ գրում է Le Parisien-ը:

Բարի գալուստ Ալֆորվիլ՝ Փարիզից ոչ հեռու գտնվող Վալ դե Մարն դեպարտամենտում գտնվող այս փոքրիկ քաղաքը, որն անվանել են «Փոքրիկ Հայաստան»: Այստեղի 45 հազար բնակիչներից 7 հազարը հայկական ծագում ունեն: Կա Աշտարակի հրապարակ, Երեւանի բուլվար:

Արետը Ստամբուլից Ֆրանսիա է ժամանել 1981-ին: Երբ նա զբաղված չէ իր խանութում, նա ակորդեոն է նվագում  «Հայկական թղթեր» սիրողական համույթում: Հայկական թաղամասի բնակիչները գալիս են նրանից լավաշ, լիբանանյան հաց, խաղողի տերեւներ եւ պանիր գնելու:

Արետը կարծում է, որ այստեղ հայերին կարելի է բաժանել երկու խմբի՝ Հայաստանից, Ռուսաստանից եւ Վրաստանից եկած հայեր, որոնք գնում են հունական ֆետա պանիր, եւ մյուսները: Հայկական եկեղեցու կողքին Կոմիտասի անվա փողոցն է. հայր Տիրայրը պատրաստվում է հայ առաքելական եկեղեցում պատարագ մատուցել: Սուրբ Տիրամոր վերափոխման օրը 1930-ին կառուցված եկեղեցին լեփ-լեցուն է: Մարդիկ իրենց հետ օրհնելու խաղող են բերում:

«Առանց օրհնության այն ուտել չի կարելի, դա մեր ավանդույթն է»,- ասում է նա:

Եվրոպայի հրապարակում կա եւս մեկ հայկական եկեղեցի՝ ավետարանչական: Այստեղ տեղադրված է Սուրբ Մեսրոպ Մաշտոցի կիսանդրին, որը բացվել է անցյալ տարի: