Հռոմի Սրբազան Քահանայապետ Ֆրանցիսկոսի Հայաստան կատարած պատմական այցին անդրադարձել են նաև գերմանական և ավստրիական լրատվամիջոցները:

Գերմանական հայտնի Deutsche Welle հեռուստառադիոընկերության կայքն անդրադարձել է շաբաթ օրը Հանրապետության հրապարակում տեղի ունեցած Էկումենիկ արարողությանն ու Խաղաղության աղոթքին, որին մասնակցել են տասնյակ հազարավոր հավատացյալներ։ Լրատվամիջոցը նաև նշում է, որ Ֆրանցիսկոսը երկրորդ Հռոմի պապն է, ով այցելում է Հայաստան՝ «աշխարհի ամենահին քրիստոնյա երկիր»։

Ավստրիական Die Salzburger Nachrichten լրատվամիջոցը նույնպես անդրադարձել է Հանրապետության հրապարակում տեղի ունեցած արարողությանն ու աղոթքին ու նշել, որ «արարողությունն անց է կացվել Երևանի տոնականորեն զարդարված գեղեցիկ կենտրոնում՝ իր շուրջը հավաքելով Հայաստանի տարբեր քաղաքներից ու այլ երկրներից ժամանած բազմաթիվ հավատացյալների ու պարզապես զբոսաշրջիկների, որոնց բախտ է վիճակվել այս օրերին գտնվել Հայաստանում»։

Bild.de լրատվամիջոցն անդրադարձել է Հռոմի պապի՝ Հայոց ցեղասպանության մասին խոսքերին ու դրան Թուրքիայի վրդովմունքին։ «Պապը միշտ խաղաղության ու երկխոսության տեսանկյունից է խոսում», -ԹԵՐԹ.ամ-ի փոխանցմամբ՝  մեջբերվում են Վատիկանի խոսնակ Ֆեդերիկո Լոմբարդիի խոսքերը։ Նա նշել է, որ Պապի ուղերձը միայն խաղաղասիրական բնույթ է կրում և կողմերին հաշտության կոչ է անում։

Հռոմի պապի այցին է անդրադարձել նաև Deutschlandfunk ռադիոընկերության կայքն ու այցը Վատիկանի համար դիվանագիտորեն վտանգավոր քայլ անվանել, քանի որ Պապը պլանավորում է սեպտեմբեր ամսին այցելել Հայաստանի հետ թշնամական հարաբերությունների մեջ գտնվող մուսուլմանական Ադրբեջան, այնուհետև՝ Վրաստան։

Mindener Tageblatt պարբերականն իր անդրադարձի մեջ նշում է, որ Հռոմի պապի հայաստանյան այցը գրավել է միջազգային կարևորագույն լրատվամիջոցների ուշադրությունն ու մեջբերել է Պապի՝  հայ ժողովրդին ուղղված բարեմաղթական խոսքը։

Domradio.de կրոնական ուղղվածությամբ հեռուստառադիոընկերության կայքն անդրադառնում է Հանրապետության հրապարակում տեղի ունեցած Էկումենիկ արարողությանն ու Խաղաղության աղոթքին ու նշում, որ Հռոմի պապի հայաստանյան այցն ավարտվելու է կիրակի օրը՝  Ամենայն Հայոց Կաթողիկոսի հետ համատեղ հայտարարության ստորագրմամբ ու Խոր Վիրապի վանքում առ Աստված աղոթք հնչեցնելով։