Ապրիլյան մարտերի ժամանակ ծանր վիրավորված զինծառայող Ռուբեն Առաքելյանի հետագա բուժումը Գերմանիայում շարունակելու համար Հայաստանի Պաշտպանության նախարար Սեյրան Օհանյանը խոստացել է տրամադրել պահանջվող շուրջ 43 հազար եվրո գումարը:

Այդ մասին Panorama.am-ին տեղեկացրեց Հանրային խորհրդի անդամ, հասարակական գործիչ Անահիտ Բախշյանը:

«Նրան են ներկայացրել կլինիկայի պահանջած գումարը՝ ըստ կարիքների, և բանկային հաշվի քաղվածքը, թե որքան գումար կա Ռուբենի համար բացված հաշվեհամարում: Նախարարն ասել է, որ տարբերությունը, որքան գումար պակասում է, ամբողջությամբ կտրամադրի», -տեղեկացրեց տիկին Բախշյանը, որը հետևում է վիրավոր զինծառայողների բուժման կազմակերպման գործընթացին:

Նա ընդգծեց, որ Ռուբեն Առաքելյանի բուժման գործում մեծ ներդրում ունի նաև Հայաստանի վարչապետը: «Շուրջ 20 հազար եվրո էլ վարչապետն է տրամադրել», -նշեց Բախշյանը:

Այդուհանդերձ, տիկին Բախշյանը տարօրինակ է համարում այն, որ վիրավոր զինծառայողների բուժումը արտերկրում պետության միջոցներով կազմակերպելու մասին օրենքը ընդունվեց, սակայն պետական բարձրաստիճան պաշտոնյաները իրենց անձնական միջոցներն են տրամադրում զինծառայողների բուժման համար:

«Բայց օրենքում կա մի կետ, որի համաձայն նշվում է՝ եթե Հայաստանում բուժումը հնարավոր չէ կազմակերպել, բայց այստեղ պնդում են, որ կարող են կազմակերպել, հետևրաբար կարիք չկա Ռուբենին տեղափոխելու: Բայց բոլորն էլ, նաև պաշտոնյաները, շատ լավ գիտեն, որ անշուշտ, Գերմանիայում բժշկությունը շատ ավելի բարձր մակարդակ ունի, քան Հայաստանում», -հավելեց տիկին Բախշյանը:

Այժմ, ըստ Բախշյանի, հերթը առողջապահության նախարարությանն է՝ դեսպանատան միջոցով զինծառայողի տեղափոխումը արագ կազմակերպելու համար:

«Ռուբենի մայրն էլ շատ դեպրեսիվ վիճակում է, բայց երբ իմացավ, շատ ուրախացավ: Մեկ օր շուտ Ռուբենը պետք է գնա, հասնի այնտեղ, կլինիկա, ու համոզված եմ, որ դրական արդյունքներ կտեսնենք», -հավելեց մեր զրուցակիցը:

Ռուբենին աջակցելու համար բացված են հետևյալ հաշվեհամարները.

ՎՏԲ բանկ. AMD 16041036866800
USD   16041036866801
EUR   16041036866802
RUR   16041036866803

Ստացող՝ Անահիտ Մկրտչյան