Արցախի ֆրանսիացի բաեկամները Թալիշում կրկին ականատես եղան պատերազմի ցավալի հետեւանքներին: Այդ հետեւանքներից ամենացավալին Թալիշի ամայացումն է: Ավերակ տներ, անխնամ այգիներ: Ու հանկարծ ֆրանսիցիներին ողջունում է գյուղացիներից մեկը, գրում է armradio.am-ը:

Զարմացած ֆրանսիացիներին  հարցը թվում է տեղին, բայց արցախցու համար անտրամաբանական է հնչում:

— Ինչու եք մնացել այստեղ:

-Բա իմ տունն է, ինչ պիտի անեի: Եկեք գնանք բաղը: Հողում պահած օղի ունեմ:

-Կբերեք երեխաներին:

-Ոչ:

Բորիս Մեժլումյանի բազմամարդ ընտանիքը  ադրբեջանական ագրեսիայի հետեւանքով ցրվել է: Ինքը նախկին զինվորական է:  Մնացել է` Թալիշի  վերականգնումը տեսնելու հույսով: Ֆրանսիացի պատգամավորներին ճանաչելով`խնդրում է իր ուղերձը փոխանցել Ֆրանսիայի նախագահ Ֆրանսուա Օլանդին:

« Ասեք՝ օգնեն, որ մեր գյուղացիները վերադառնան: Մեր գյուղը երկու անգամ տեղահանվել է :Մի՞թե աշխարհը դա չի տեսնում»,- ասում է։

Պատգամավորները խոստանում են թալիշցու  ուղերձը փոխանցել ԵԱՀԿ ՄԽ համանախագահող երկրի ղեկավարությանը: Ռնե Ռուքեն ասում է, որ ռմբակոծությունների, ադրբեջանցիների կողմից բնակիչների սպանության հետեւանքով  տեղահանված Թալիշում թալիշցու հետ հանդիպումը բացառիկ էր ինքնին, ուղերձն` առանձնապես:

Արցախի ֆրանսիացի բարեկամներն  ի պաշտպանություն Արցախի՝ իրենց ձայնը բարձրացրել են ապրիլյան ագրեսիայի օրերին, բայց ասում են, որ ավելին անելու համար  պետք է գային ու տեղում տեսնեին պատերազմի հետեւանքները: Նրանք եղան պաշտպանության բանակի այն դիրքերում, որտեղ ապրիլի 2-5 –ը  մարտեր են մղվել: Զրուցեցին զինծառայողների հետ: Տպավորված էին երիտասարդ մարտիկների կամքով:

Արդեն Մարտակերտում շրջանի սահմաններում եւ բնակավայրերում ապրիլի սկզբին եւ այսօր տիրող իրավիճակի մասին ֆրանսիացի պատգամավորները զրուցում են շրջվարչակազմի ղեկավար Վլադիկ Խաչատրյանի հետ:

Իրենց տեսածն ու լսածն օգնելու է, որպեսզի կարողանան ավելի լավ բացատրել իրենց իշխանություններին, ԵԱՀԿ ՄԽ  ներկայացված դեսպանին իրերի վիճակը: Արցախի բարեկամները հակամարտութայն լուծման բանալին գիտեն`  Լեռնային Ղարբաղը չի կարող դուրս մնալ բանակցություններից, իսկ հակամարտության հանգուցալուծումը պետք է լինի Արցախի ճանաչումը: