Գիտաժողովը նպատակ ունի փոխճանաչելիության և փոխգործակցության նպատակով քննարկման հրավիրելու հայագիտության՝ հայոց պատմության, լեզվի և գրականության, կրոնական, ինքնության տարաբնույթ խնդիրների շուրջ ՀՀ, ԼՂՀ և Սփյուռքի գիտակրթական, մշակութային, լրատվական, գրադարանային դաշտին առնչվող առաջատար կառույցների, կազմակերպությունների համացանցային հարթակներում ներկայացված կայքերի, սոցիալական ցանցերի և բլոգոլորտի պատասխանատու ներկայացուցիչներին, հնարավորություն ընձեռելու համատեղ ազգօգուտ համացանցային տեղեկատվական նախագծեր ծրագրելու, համացանցային հարթակում հայակենտրոն տեղեկատվական տիրույթի ձևավորմանը նպաստելու:

Մասնակցության հայտը, ներառյալ զեկույցի ամփոփումը լրացնելու համար խնդրում ենք մուտք և լրացնել հայտը: Ձեր հայտը մեր կողմից դիտարկելուց հետո Ձեր նշած էլ. փոստին կստանաք պատասխան:

Հայտերի ընդունման վերջնաժամկետը սույն թվականի մայիսի 15-ն է:

Զեկույցի ներկայացման վերջնաժամկետը սույն թվականի մայիսի 30-ն է:

Գիտաժողովի թեմատիկ ուղղություններ.

1.««Հայկական աշխարհը» համացանցի գիտակրթական հարթակում»:

2.«Տեղեկատվական անվտանգության մարտահրավերները համացանցում»:

Ձեր կողմից ներկայացրած զեկույցը իր բովանդակային ուղղվածությամբ պետք է համապատասխանի գիտաժողովի վերը նշված երկու թեմատիկ ուղղություններից մեկին:

Զեկույցը պետք է բովանդակային առումով վեր հանի խնդրահարույց հարցեր, դիտարկի հարցի անցյալի և ներկայի իրավիճակները, ներկայացնի հնարավոր լուծումների և առաջարկների տարբերակներ: Գիտաժողովի հիմնական գործածական լեզուներն են հայերենը, ռուսերենը, անգլերենը:

Գիտաժողովի ամփոփումներն ու զեկույցները լույս են տեսնելու առանձին ժողովածուի տեսքով: Հայտը հաստատվելու դեպքում պատրաստ ենք ապահովել Ձեր գիշերակացը և կեցությունը:

Չափանիշներն են`

Զեկույցը ուղարկեք conference@armin.am էլ.փոստին (տեքստը` Word, նկարները` TIFF կամ բարձրորակ JPG ձևաչափերով): Զեկույցը ընդունվում է հայերեն, իսկ ռուսերեն կամ անգլերեն տարբերակի դեպքում պարտադիր է նաև ներկայացնել հայերեն (շուրջ 5 էջ):

1.Տառատեսակը հայերեն` Sylfaen, այլ լեզուներինը` Times New Roman:

2.Տառաչափը` 12, միջտողային բացատը` 1.5:

3.Զեկույցի սկզբում դրվում է հեղինակի անուն, ազգանունը (գլխատառերով), գիտական աստիճանն ու կոչումը, աշխատանքի վայրը, պաշտոնը, էլ. փոստի անվանումը, զեկույցի վերնագիրը (գլխատառերով):

4.Զեկույցի մեջ տեղ գտած հղումները տրվում են տողատակում` աճման կարգով, տառաչափը` 10, նշվում է աղբյուրի հեղինակի ազգանունը, անվան և ազգանվան առաջին տառերը, վերնագիրը, հատորը, հրատարակության տեղը, տարեթիվը (մամուլի դեպքում` նաև համարը) և էջը, իսկ համացանցային հղման դեպքում՝ նյութի հեղինակի (եթե առկա է) ազգանունը, անվան և ազգանվան առաջին տառերը, վերնագիրը, ամբողջական հղումը (URL) և հղումը կատարելու ամսաթիվը` (00.00.2016):

5.Զեկույցին կից պետք է գրել 12 բանալի բառեր:

ԿԱԶՄԿՈՄԻՏԵ