Փետրվարի 28-ին Բուլղարիայի Պլովդիվ քաղաքում Հայաստանի պատվո  հյուպատոս Եղիազար Ուզունյանի նախաձեռնությամբ տեղի ունեցավ ուխտագնացություն դեպի Սուրբ Գևորգ հայկական եկեղեցի` ի հիշատակ Սումգայիթում զոհված անմեղ հայերի: Այս մասին «Հայերն այսօր»-ին հայտնում է Աղավնի Գևորգյանը Պլովդիվից:

Հայր  Հրաչ Մուրադյանը հոգեհանգստյան կարգ կատարեց տաճարում, որտեղ հավատացյալները մոմ վառեցին  և աղոթեցին անմեղ զոհերի հոգիների համար: Պատարագից հետո բոլորը հավաքվել էին եկեղեցու բակում՝ ունկնդրելու  դուդուկի հոգեզմայլ հնչյունները:

Եղիազար Ուզունյանը կարճ, բայց սրտառուչ խոսքով  ներկայացրեց տեղի ունեցած ողբերգության դրվագները և  բոլորի անունից զորակցություն հայտնեց ներկայում Հայրենիքի սահմանները պահող զինվորներին: