Փետրվարի 18-ին Թուրքմենստանում ՀՀ դեսպանությունը մասնակցություն ունեցավ Թուրքմենստանի դիվանագիտական աշխատակցի օրվան նվիրված տոնական միջոցառումներին: Այս մասին հայտնում են ԱԳՆ մամուլի ծառայությունից:

Թուրքմենստանի ԱԳՆ Միջազգային հարաբերությունների ինստիտուտում բացվեց ցուցահանդես, որին իրենց մասնակցությունն են ցուցաբերել Թուրքմենստանում հավատարմագրված դիվանագիտական ներկայացուցչությունները և միջազգային կազմակերպությունների առաքելությունները:

ՀՀ դեսպանության տաղավարը արժանացավ բարձր գնահատականի և զգալի հետաքրքրություն առաջացրեց ցուցահանդեսի մասնակիցների և հյուրերի մոտ: Տաղավարում ներկայացված էին Հայաստանի տեսարժան վայրերին և զբոսաշրջությանը, կրթությանը, արվեստին ու արհեստին վերաբերող նյութեր և առարկաներ:

Հայկական տաղավար առաջինն այցելեց Թուրքմենստանի փոխվարչապետ, ԱԳ նախարար Ռաշիդ Մերեդովը: Թուրքմենստանում ՀՀ դեսպան Վլադիմիր Բադալյանը նրա հետ զրույցում շնորհավորեց մասնագիտական տոնի կապակցությամբ և հաջողություն մաղթեց հետագա գործունեության ընթացքում: Թուրքմենստանի ԱԳ նախարարը շնորհակալություն հայտնեց տոնական միջոցառումներին ակտիվ մասնակցության համար: Զրույցի ընթացքում տեղի ունեցավ մտքերի փոխանակում երկկողմ համագործակցության հետագա զարգացման վերաբերյալ: