Ղազախստանի Կոստանայ մարզի «Էրեբունի» հայկական համայնքը Կոստանայ քաղաքում կազմակերպել էր նախատոնական հաշվետու համերգ` Հրաչ և Գայանե Մարտիրոսյանների  ղեկավարությամբ:  Այս մասին «Հայերն այսօր»-ին հայտնում է Գայանե Մարտիրոսյանը:

Համերգային ծրագիրը կազմված էր այնպես, որ մասնակիցները հնարավորություն ունե­նային հաղորդակցվելու հայի հոգուն, հայկական մշակույթին և հայոց լեզ­վին։ Հա­մերգին մասնակցում էին նաև այլ համայնքների ներկայացուցիչներ, ովքեր կատարեցին ֆրան­սերեն, ռուսերեն և ղազախերեն երգեր։  Մասնակիցները հիացմունքով ընդունեցին «Լեզ­գինկա»  պարը, իսկ երբ հայ տաղանդավոր երիտասարդները  կատարեցին մեր ավան­դական «Քոչարին»,  «Կինտոների պարը» և հայկական ժողովրդական երգեր, դահլիճը թնդաց բուռն ծափահարություններից։

Շնորհավորական խոսքով հանդես եկավ Կոս­­տա­նայ մարզի  «Էրեբունի» հայկական համայնքի նախագահի տեղակալ Հրաչուհի Գևոր­գ­յանը։  Համերգի կազմակերպիչները անակնկալ էին պատրաստել փոքրիկ հանդիսա­տես­ների համար. բոլորին, առանց բացառության, հանձնվեցին  քաղցր նվերներ։ Ի դեպ, նվեր­ներ ստացան նաև մեծահասակները։  «Էրեբունի»   համայնքի խորհրդի ան­դամ Սերգեյ Սար­գսյանը հոգացել էր, որ, հայկական երաժշտություն, զվարճալի երգեր ու պարեր վա­յելելուց զատ նրանք էլ ճաշակեն հայկական քաղցրավենիք։

Հավելենք, որ նման միջոցառումներ  հաճախ են  կազմակերպվում  «Էրեբունի»   հայ  համայնքի կողմից՝ այդպիսով հայրենիքից հեռու ապրող հայերին օգնելով մտովի հաղորդակցվել հարազատ մշակույթի, մայրենիի հետ ու հավատարիմ մնալ ազգային արմատներին: