Դեկտեմբերի 15-ին` նիստի բացմանը, պատվիրակությունների նախապատրաստական խմբերի ղեկավարներ ՀՀ ԱԳՆ Մերձավոր և Միջին Արևելքի վարչության պետ Սարմեն Բաղդասարյանը և Քուվեյթի Տնտեսական հարցերով հանձնակատարի տեղակալ Սամի Նասեր Ալ-Սակաբին գոհունակությամբ ընդգծեցին երկու ժողովուրդների միջև առկա փոխվստահության բարձր մակարդակը, ինչը հիմք է հանդիսանում երկկողմ բարեկամական հարաբերությունների առավել խորացման և ամրապնդման համար:

Դեկտեմբերի 17-ին հանդես գալով հայ-քուվեյթական միջկառավարական հանձնաժողովի եզրափակիչ նիստին ՀՀ ՏԿԱԻ նախարար Արմեն Երիցյանն ընդգծեց նախանշված աշխատանքների իրագործման կարևորությունը երկու բարեկամ երկրների միջև համագործակցության սերտացման համար: Առանձնահատուկ կարևորվեց Քուվեյթի և Հայաստանի միջև ուղիղ օդային կապ հաստատելու հրամայականը, որի բացակայությունը լուրջ խոչընդոտ է հանդիսանում առևտրատնտեսական ու միջմշակութային կապերի, ժողովուրդների շփումների ամրապնդման համար:

Նիստի ավարտին նախարարներ Երիցյանը և Խալեդ Ալ-Սալեհը ստորագրեցին Կրթության և գիտության ոլորտում համագործակցության գործողությունների ծրագիր, Բժշկագիտության և առողջապահության ոլորտում համագործակցության շուրջ փոխըմբռնման հուշագիր, ինչպես նաև միջկառավարական հանձնաժողովի նիստի Համաձայնեցված արձանագրությունը:

Նախարար Երիցյանը նաև հանդիպում ունեցավ Քուվեյթի Պետության վարչապետ շեյխ Ջաբեր Ալ-Մուբարաք Ալ-Համադ Ալ Սաբահի հետ, որի ընթացքում կողմերն անդրադարձան երկու երկրների կառավարությունների միջև տարատեսակ ոլորտներում համագործակցության, փոխօգնության հարցերին, ինչպես նաև քննարկեցին տարածաշրջանային արդի խնդիրներ: