Ամերիկյան Huffington Post պարբերականն անդրադարձել է ամերիկահայ լուսանկարիչ Դիանա Մարկոսյանի «1915» ֆոտոնախագծին, որը ներկայացնում է  Հայոց ցեղասպանության վերապրածների անձնական հուշերն ու պատմությունները:

mediamax.am-ի փոխանցմամբ՝ 2014 թ.-ին հոկտեմբերին Դիանա Մարկոսյանը կարողացավ Հայաստանում հանդիպել ցեղասպանությունը վերապրած 10 անձանց հետ, որոնցից միայն երեքը՝ Մովսես Հանեշյանը, Մարիամ Սահակյանը եւ Եփրաքսիա Գեւորգյանը, կարողացան հեղինակին պատմել այն մասին, թե ինչպես էին ապրում իրենց ծննդավայրում ցեղասպանությունից առաջ:

Լուսանկարիչն այցելել է ոչ միայն վերապրածներին, այլեւ նրանց ծննդավայրերը, որոնք վերջիններս ստիպված էին լքել ցեղասպանությունից հետո:

Փորձելով վերամիավորել կորուսյալ հայրենիքի մասունքները՝ նա լուսանկարել է Արեւմտյան Հայաստանի բնության տեսարանները եւ համադրել դրանք Հայաստանի Հանրապետության այն վայրերի հետ, որտեղ այժմ բնակվում են ցեղասպանության ականատես երեք տարեցները:

Դիանա Մարկոսյանի պատմելով, երբ 105-ամյա Մովսես Հանեշյանը տեսավ իր ծննդավայրում թողած տան մեծ լուսանկարը, նա մի պահ կանգ առավ եւ սկսեց պարել լուսանկարի մոտ:

«Նրանք բոլորը կարծես աքսորի մեջ էին եւ մեկ դար անց, տեսնելով իրենց հայրական տան լուսանկարը, ճանաչեցին դրանք»,- պատմում է Դիանան:

Դիանա Մարկոսյանի «1915» ֆոտոնախագիծն այժմ ցուցադրվում է Նյու Յորքի համալսարանի Մերձավոր Արեւելքի ուսումնասիրությունների Հակոբ Գեւորգյան կենտրոնում: