Հայ ուսումնասիրաց «Չահարմահալ» միության Նոր Ջուղայի մասնաճյուղի  վարչության նախաձեռնությամբ , ուրբաթ` նոյեմբերի 13-ի երեկոյան, նույն միության  կենտրոնատեղիի հարկի տակ նշվեց միության հիմնադրման եւ գործունեության 85-րդ տարեդարձը: Այս մասին Իրանից «Հայերն այսօրին» տեղեկացնում է  Երանուշ  Թահմազյանը:

Միության հիմնադիր անդամների պատկերների ներքո,  հանդիսության մեկնարկը տրվեց միության հիմնի հոտնկայս ունկնդրությամբ,որից հետո ողջույնի եւ բացման խոսքով հանդես եկավ օրվա հաղորդավար` Կարեն Խանլարյանը,ապա խոսքը տրվեց   Տ. Մեսրոպ ավագ քահանա Գալստյանին: Քահանա Հայրը, շնորհավորելով  միության 85-ամյակը, կարեւորությամբ ընդգծեց  հայ համայնքներում, ազգային մարմինների կողքին աշխատող միությունների ներկայությունը եւ հայապահպանման առումով նրանց  նշանակալի դերը : Նա դրվատելով  միության ծավալած աշխատանքները, հույս հայտնեց, որ   նոր սերունդը եւս  պահապանը լինի  այս  գաղափարաբանության  եւ նման հավաքական կյանքի գաղափարը   փոխանցի ապագա սերունդին:

Այնուհետեւ   հոբելյար միության 85-ամյակի տորթը կտրելու պատիվը տրվեց միության բազմավաստակ եւ ամենաերեց անդամներ` Եսայի Թորոսյանին,Նվարդ Վարդանյանին եւ Սաքո Սիմոնյանին:

Հաջորդիվ   6-ամսյա ծավալած աշխատանքներից համառոտ զեկույց ներկայացրեց  միության Կենտրոնական վարչության  անդամ  Սոնիա Միրզաբեգյանը եւ ընթերցեց Թեհրանից հղված Հայ ուսումնասիրաց «Չահարմահալ» միության Կենտրոնական վարչության ուղերձը:

Երեկոյի ընթացքում  հերթաբար   ելույթ ունեցան միության Հաշվեքննիչ մարմնի, Ձեռնարկային հանձնախմբի եւ Գեղարվեստական միավորի ներկայացուցիչներ` Ֆրիդա Ալահվերդյանը,  Սեդա Բալյանը եւ Արազ Տեր-Գրիգորյանը,  նաեւ «Փերիո» կրթասիրաց միության նախագահ Հայկ Հայրապետյանը:

Գեղարվեստական բաժնում   երգերով հանդես եկավ  Րաֆֆի Խուդաբախշյանը, որին կիթառի   կատարմամբ  ընկերակցում էր  Ժանետ Խուդաբախշյանը: Երգեցին նաեւ Լիդա Հակոբյանը եւ Ռիտա Մինասյանը, որոնց երգեհոնի կատարմամբ ընկերակցում էր Ալբերթ  Ղազարյանը:

Պաշտոնական բաժինը ամփոփվեց  միության  վարչության նախագահ Վարդանես Մկրտչյանի շնորհակալության խոսքերով՝ ուղղված բոլոր նրանց, որոնց համագործակցությամբ  իրականացավ միջոցառումը:

Պաշտոնական բաժնից հետո` հրավիրվեցին եւ ընթրիքի սեղանը օրհնեցին  հոգեւոր հայրերը:Երեկոն շարունակվեց ընդունելությամբ եւ խրախճանքով:

Ընթացքում ներկանները առիթ ունեցան այցելելու նաեւ սրահին կից  կազմակերպված   ցուցահանդեսը, որը   Չահարմահալ գավառի հայկական տարազով եւ լուսանկարների միջոցով ներկայացնում էր գավառի եւ միության հարուստ անցյալի մի  փոքր հատվածը:

 Հատկանշելի է, որ  հոկտեմբերի  30-ին, նախաձեռնությամբ   Հ.Ուս. «Չահարմահալ» միության Նոր Ջուղայի մասնաճյուղի վարչության,  Ս.Ստեփանոս եկեղեցում տեղի է ունեցել Հոգեհանգստյան արարողություն` ի հիշատակ ննջեցյալ հիմնադիրների ու միութենականների հոգու խաղաղաղության:

Լուսանկարները՝ հեղինակի