Թուրքիայի ազգային փոքրամասնությունների 80 տոկոսն ահազանգում է, որ չի կարող ազատորեն արտահայտվել սոցիալական մեդիայում, իսկ 35 տոկոսը տեղեկացնում է, որ այդ նույն հարթակում իրենք դառնում են ատելություն քարոզող խոսքի թիրախ:

Թուրքական Hurriyet Daily News-ը, այս մասին է վկայում Եվրամիության ֆինանսավորմամբ Յենիքյոյի Հույն ուղղափառ եկեղեցու իրականացրած հարցումը Թուրքիայի փոքրամասնությունների շրջանում, գրում է Արցախպրեսը:

Հարցումն անցկացվել է Թուրքիայի 746 քաղաքացու շրջանում, ովքեր ազգությամբ հույն, հայ, հրեա կամ ասորի են: Հարցվածների միայն 20 տոկոսն է ասել, որ սոցիալական մեդիայում ազատորեն արտահայտում է մտքերը, իսկ գերակշիռ մեծամասնությունը փաստել է, որ վախն ու մտահոգությունները թույլ չեն տալիս սոցիալական հարթակներում, ինչպիսիք են Facebook-ը, YouTube-ը և Instagram-ը, լինել ազատ:

Հարցվածների 80 տոկոսն անհրաժեշտ է համարել Թուրքիայում իրավական մեխանիզմների մշակումը, որը տուգանք կսահմանի սոցիալական մեդիայում վիրավորանքի կամ խտրականության համար: