Թուրքիայի Դիարբեքիր նահանգի գլխավոր դատախազությունը Արդարադատության նախարարությունից պահանջել է քրդամետ «Ժողովուրդների դեմոկրատական կուսակցության» (ԺԴԿ-HDP)  համանախագահ Սելահաթթին Դեմիրթաշին զրկել պատգամավորական անձեռնմխելիությունից, ինչպես նաև դատական գործ հարուցել նրա նկատմամբ մի շարք մեղադրանքներով:

Թուրքական «mynet» լրատվական կայքի փոխանցմամբ` Դիարբեքիրի դատախազությունը լրագրողներին մամուլի ասուլիսով պարզաբանել է, որ Դեմիրթաշը թուրքական պետությանը և պետական կառույցներին վիրավորող հայտարարություններ է արել, գրում է ermenihaber.am-ը:

Բացի դրանից «ԺԴԿ»-ի համանախագահը մեղադրվում է նախագահ Էրդողանին վիրավորելու և ահաբեկչական կազմակերպության քարոզչություն իրականացնելու, ինչպես նաև բացեիբաց հանցագործություն հրահրելու մեջ: Նշվում է, որ վերոնշյալ մեղադրանքների ապացուցուման դեպքում Դեմիրթաշին սպառնում է 4-19 տարի ազատազրկում:

Պատգամավորական անձեռնմխելիությունից զրկելու պահանջը ներկայացվել է Թուրքիայի սահմանադրության 83-րդ հոդված համաձայն: