Այսօրվանից Հայաստանում մեկնարկում են «Շանթ-2015» ռազմավարական հրամանատարաշտաբային զորավարժությունները։ aysor.am-ի փոխանցմամբ՝ այս մասին այսօր ՊՆ-ում լրագրողների հետ հանդիպման ժամանակ ասաց Պաշտպանության նախարարի մամուլի քարտուղար Արծրուն Հովհաննիսյանը:

Ասուլիսի ընթացքում նա անդրադարձավ լրատվամիջոցներում շրջանառվող այն տեղեկություններին, թե Տավուշի մարզում ստեղծված սահմանային լարված իրավիճակի պատճառով որոշ գյուղերից բնակիչներ են տարհանում:

«Այս լուրերն անցկացվող զորավարժությունների սցենարի մի մասն են: Տավուշի մարզում՝ զորավարժությունների շրջանակներում ստեղծվել է ուսումնական կենտրոն, որտեղ մի քանի հարյուր մահճակալ է տեղադրվել: Մենք փորձում ենք պարզել, թե անհրաժեշտության դեպքում ինչպես է իրականացվելու բնակիչների տարհանումը»,- ասաց Արծրուն Հովհաննիսյանը՝ մեկ անգամ ևս ընդգծելով, որ սա արվում է զորավարժությունների սցենարի համաձայն: