Ֆրանսահայ լեգենդար երգիչ Շառլ Ազնավուրն անակնկալ է պատրաստել իր փարիզաբնակ երկրպագուների համար: Ճանաչված երգիչը վեց համերգով հանդես կգա Փարիզի Palais des Sports սրահում: Ինչպես տեղեկացնում է «Արմենպրես»-­ ը՝ վկայակոչելով nostalgie.fr կայքը, համերգները կանցկացվեն սեպտեմբերի 15­-27­-ը:

Կայքը գրում է,որ Ազնավուրը վաղուց է լեգենդ դարձել: Փաստի վկայությունն են նրա վաճառված ձայնասկավառակները և շրջագայությունների ժամանակ լեփ­լեցուն դահլիճները: Բայց սիրված երգիչը դեռ չի ասել իր վերջին խոսքը: nostalgie.fr­ը տեղեկացնում է, որ համերգները տեղի կունենան սեպտեմբերի 15-­ին, 17­-ին, 19-­ին, 23-­ին, 25-­ին և 27­-ին։ Ազնավուրը կկատարի իր ամենահայտնի և նոր «Encores» ալբոմի ստեղծագործությունները:

Նշանավոր ֆրանսահայ շանսոնյե, երգիչ, երգահան, կինոդերասան և հասարակական գործիչ Շառլ Ազնավուրը ծնվել է 1924 թվականի մայիսի 22-­ին Փարիզում: Բազմաթիվ հայտնի գործերի հեղինակ և կատարող է: Վաճառվել է Ազնավուրի ստեղծագործություններն ամփոփող շուրջ 100 միլիոն ձայնապնակ:

2009 թվականից Ազնավուրը Շվեյցարիայում Հայաստանի դեսպանն է, ինչպես նաև Ժնևի ՄԱԿ­ի գրասենյակում և այլ միջազգային կազմակերպություններում Հայաստանի մշտական ներկայացուցիչը: