Huffington Post-ը ներկայացնում է Ստենլի Վայսի՝ Վաշինգտունում գործող Business Executives for National Security կազմակերպության հիմնադրի հոդվածը՝ Ռոբերտ Լեմսոնի «Հրեշի մեջքին. հերոսություն, սեր և գոյատևում» (On The Monster’s Back: Heroism, Love and Survival) գրքի վերաբերյալ: Հոդվածը armeniangenocide100.org-ը ներկայացնում է ստորև, զգալի կրճատումներով.

Այս պատմությունն այնքան շատ անգամներ է ասվել, որ զարմանալի է, թե ինչու մարդիկ ավել ծանոթ չեն դրա հետ, կամ էլ թե ինչու չի այն մեզ չափազանց անհանգստացնում: Երբ Հիտլերը Հոլոքոստի «գործն էր առաջ տանում», նրան ասացին, որ պատմությունը չի մոռանա ու չի ների իրեն: Իսկ ի՞նչ պատասխանեց նա. «Ո՞վ է այսօր հիշում հայերի ոչնչացումը»:

Այս տարի, մենք ոգեկոչում ենք Հայոց ցեղասպանության 100-րդ տարելիցը, և Ռոբերտ Լեմսոնը «Հրեշի մեջքին. հերոսություն, սեր և գոյատևում» գրքի միջոցով հիշեցնում է Առաջին աշխարհամարտի տարիներին իրագործված տեղահանության մասին, որը միլիոնավոր մարդկանց՝ հայերի, ինչպես նաև հույների ու ասորիների կյանք խլեց: Նա պատմում է մի երիտասարդի գոյատևման պատմությունը:

Երիտասարդը՝ Սուրեն Թաշչյան անունով, ապրում էր Զմյուռնիա (Իզմիր) քաղաքում, որտեղ գործարարներ և միսիոներներ էին գալիս աշխարհի տարբեր ծայրերից:Երբ  Սուրենը մանուկ էր, Զմյուռնիայում համեմատաբար  հանդուրժողական իրավիճակ էր տիրում, չնայած նախկինում և հալածական, և խտրական վերաբերմունք էր դրսևորվել փոքրամասնությունների նկատմամբ: