Հայոց Ցեղասպանության 100-րդ տարելիցին նվիրված միջոցառումների շրջանակներում ապրիլի 29-ին Պեկինի «Bookworm» գրախանութում կայացել է ամերիկահայ գրող Դեյնա Ուոլրաթի (Dana Walrath) Հայոց ցեղասպանության մասին պատմող ”Like Water on Stone” գրքի շնորհանդեսը: Այս մասին «Հայերն այսօր»-ին հայտնում են Չինաստանում ՀՀ դեսպանությունից:

Ներկայացնելով գրքի ստեղծման նախապատմությունը՝ Դեյնա Ուոլրաթը մանրամասնորեն պատմել է դարասկզբին պատմական Արևմտյան Հայաստանի տարբեր շրջաններում կատարված ոճրագործությունները:

Միջոցառմանը ներկա են գտնվել դիվանագետներ, չինացի գրականագետներ և լրագրողներ:

”Like Water on Stone” գիրքը պատմում է 14-ամյա Շահեն և Սոսի երկվորյակների մասին, ովքեր մոգական Արծվի օգնությամբ ցեղասպանությունից փրկվելու համար փախչում են լեռները, երբ Օսմանյան կայսրությունում սկսվում են հայերի զանգվածային կոտորածները:

Ամերիկահայ գրող Դեյնա Ուոլրաթն իր ելույթում կարևորել է Հայոց ցեղասպանության իրողությունը օտարերկրյա լսարանին գեղարվեստական գրականության միջոցով հասանելի դարձնելը:

Միջոցառման ավարտին ներկաները բազում  հարցեր  են ուղղել հեղինակին:

Առաջիկա օրերին հեղինակը գիրքը կներկայացնի նաև Պեկինի մի շարք այլ հաստատություններում: