Նոյեմբերի 1-ին  Փարիզում տեղի ունեցավ Հայ Առաքելական Եկեղեցու (ՀԱԵ)  Ֆրանսիայի  թեմի առաջնորդի ընտրությունները, Եպիսկոպոսաց պատվիրակությունների վեհաժողովի արտահերթ հավաքի ժամանակ: Ինչպես տեղեկացնում են ՀՀ սփյուռքի նախարարության Եվրոպայի հայ համայնքների վարչությունից, Ֆրանսիայի հայոց թեմի առաջնորդ է ընտրվել ՀԱԵ Բրիտանական եւ Իռլանդական թեմի առաջնորդ Վահան Հովհաննիսյանը :

Տ. Վահան ծայրագույն վարդապետ Հովհաննիսյանը  (ավազանի անունը` Սարգիս)  ծնվել է 1963թ. Բաղդադում (Իրաք): 1988թ. ձեռամբ Իրաքի Հայոց թեմի առաջնորդ Տ. Ավագ արքեպիսկոպոս Ասատուրյանի ձեռնադրվել է սարկավագ և մեկնել ԱՄՆ` ուսումը շարունակելու  Նյու Յորքի Ս. Վլադիմիր     աստվածաբանական ճեմարանում: 1990թ. ձեռամբ  Տ. Ավագ արքեպիսկոպոս Ասատուրյանի ձեռնադրվել  է  կուսական քահանա: 1995թ. պաշտպանելով վարդպապետական ատենախոսությունը` ստացել է Մասնավոր  վարդապետության   առաջին չորս  աստիճանները` ձեռամբ  ԱՄՆ Հայոց Արևելյան թեմի առաջնորդ  Տ. Խաժակ արքեպիսկոպոս  Պարսամյանի: 2006թ. ստացել է ծայրագույն  վարդապետության  աստիճան` պաշտպանելով  ատենախոսություն ՙԳ. Կորնթացիս թուղթըե՚ թեմայով: Այս տարիներին որպես հոգևոր հովիվ  ծառայել է  Նյու Յորքի Ս. Խաչ և Նյու Ջերզիի Սրբոց Ղևոնդյանց և Նյու Յորքի Սրբոց Նահատակաց եկեղեցիներում: Որոշ շրջան եղել է Ս. Վարդան առաջնորդանիստ եկեղեցու լուսարարապետը: Ֆորդհեմ համալսարանից ստացել է  Աստվածաշնչագիտության դոկտոր աստիճան:  Վերջին տարիներին Հայր Վահանը ծառայում էր  ԱՄՆ  Հայոց Արևելյան  թեմի  Նյու Յորքի Սրբոց Նահատակաց եկեղեցում` իբրև հոգևոր հովիվ:

   2010-ի փետրվարի 10-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ Մայր Աթոռ Սուրբ Էջմիածնի միաբան Տ. Վահան ծայրագույն  վարդապետ  Հովհաննիսյանը ստանձնել է Հայաստանյայց  Առաքելական Սուրբ Եկեղեցու Մեծ Բրիտանիայի Հայոց թեմի առաջնորդի պաշտոնը: Տ. Վահան  ծայրագույն վարդապետ  Հովհաննիսյանը Մեծ Բրիտանիայի  Հայոց թեմի առաջնորդ է  ընտրվել  2009թ.  դեկտեմբերին գումարված Բրիտանահայ Համայնքային  և Եկեղեցական խորհրդի ժողովի ընթացքում: Առաջնորդի  ընտրությունը հաստատվել է Ամենայն Հայոց Կաթողիկոսի Հայրապետական օրհնությամբ:

Հայ Առաքելական Եկեղեցու (ՀԱԵ) Ֆրանսիայի թեմական խորհուրդը Թեմի առաջնորդի ընտրության նոր գործընթացը սկսվել էր 2014 թվականի հունիսի 7-ին կայացած նիստի ժամանակ. Թեմական խորհուրդն ընդունել էր նոր ցուցակը, որում երեք թեկնածու էր ընդգրկված: Ավելի ուշ այն հաստատվել է Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հետ: Ֆրանսիայի թեմի առաջնորդի թեկնածուներն էին. Բենիլյուքսի երկրներում արեւմտաեվրոպական առաջնորդական փոխանորդ Զատիկ Ավետիքյանը, ՀԱԵ Բրիտանական եւ Իռլանդական թեմի առաջնորդ Վահան Հովհաննիսյանը, Ալպերում, Վարում եւ Մոնակոյում ՀԱԵ ծխական քահանա Գրիգոր Խաչատրյանը: