Սեպտեմբերի 28-ին ՀՀ Անկախության 23-րդ տարեդարձի առթիվ Եգիպտոսում ՀՀ դեսպանությունը կազմակերպել էր ընդունելություն:

Միջոցառմանը ներկա էին Եգիպտոսի բնապահպանության նախարար Խալեդ Ֆահմին, Եգիպտոսի մշակույթի նախարարի առաջին տեղակալ Կամելիա Սոբհին, արտաքին գործերի, միջազգային համագործակցության և այլ նախարարությունների ու գերատեսչությունների պատասխանատու պաշտոնյաներ, օտարերկրյա դեսպաններ, հասարակական-քաղաքական գործիչներ, գործարարներ, լրագրողներ, ինչպես նաև եգիպտահայ համայնքի բազմաթիվ անդամներ։

Ընդունելությանը ելույթ ունեցավ Եգիպտոսում ՀՀ դեսպան Արմեն Մելքոնյանը: Նա խոսեց անկախության տարիներին Հայաստանի ձեռքբերումների և հայ–եգիպտական հարաբերությունների զարգացման ընթացքի մասին, անդրադարձավ Լեռնային Ղարաբաղի հիմնահարցի խաղաղ կարգավորմանը` խոսելով այդ հարցում Հայաստանի` ԵԱՀԿ Մինսկի խմբի համանախագահների հետ համատեղ ներդրած ջանքերի մասին։ Անդրադառնալով Հայոց ցեղասպանության 100-ամյա տարելիցին` ՀՀ դեսպանն ընդգծեց Թուրքիայի` սեփական պատմությանն առերեսվելու հրամայականը։

Նախօրեին ՀՀ դեսպանություն էր այցելել Եգիպտոսի նախագահ Աբդել Ֆաթթահ Ալ Սիսիի անձնական ներկայացուցիչ Ահմադ Մենեսին, որը ՀՀ Անկախության 23-րդ տարեդարձի առթիվ ՀՀ դեսպանին էր փոխանցել երկրի ղեկավարի ջերմագին շնորհավորանքներն ու բարեմաղթանքները՝ ուղղված ՀՀ նախագահ Սերժ Սարգսյանին և բարեկամ հայ ժողովրդին: