Ուկրաինայի հայերի միությունը (ՈւՀՄ) ամփոփել է այդ երկրում հայկական համայնքի իրականացրած աշխատանքների արդյունքները: Ինչպես կազմակերպությունն է նշել, 2011-ին սկսված բոլոր ուղղություններով համակարգային աշխատանքի արդյունքում երկրում հայկական սփյուռքի կյանքում որոշակի կարեւոր փոփոխություններ են տեղի ունեցել: Այս մասին NEWS.am-ին հաղորդել են ՈւՀՄ մամուլի ծառայությունից:

Մասնավորապես, ընդգծվում է հայկական սփյուռքի համար ամենակարեւոր իրադարձությունը` Կիեւում հայկական տաճարի շինարարության մեկնարկը: Բացի այդ, շարունակվում է Դոնեցկում եկեղեցու շինարարությունը, ռեստավրացվում են պատմական շինություններ:

2013-ին մեծ ուշադրություն է դարձվել հայկական հարցին: Ապրիլի 22-ին կայացել է «Հայոց ցեղասպանություն. Իրավունք չունենք մոռացության մատնել» կլոր սեղանը, որին ներկա են եղել տարբեր խմբակցությունների պատգամավորներ, հասարակական գործիչներ ու փորձագետներ: Հոնիսի 6-ին Գերագույն ռադայում գրանցվել է օրինագիծ` Հայոց ցեղասպանության ճանաչման վերաբերյալ, որի նախաձեռնողներն են Վիլեն Շատվորյանը (Ռեգիոնների կուսակցություն) եւ Արսեն Ավոկովը («Բատկիվշչինա»): Նշենք, որ ուկրաինացի մտավորականներն ակտիվորեն կողմ են Հայոց ցեղասպանության ճանաչմանը:

Ուկրաինայի հայերը նաեւ նախաձեռնել են եկեղեցիների տարածքներում ցեղասպանության զոհերի հիշատակին նվիրված հուշարձանների տեղադրում:

Միջազգային գործունեություն

ՈՒՀՄ միջազգային գործունեության արդյունքում կազմակերպությունը ներառվել է Եվրոպական խորհրդի թափանցիկության ռեեստրում ու հիմա հնարավոր է դարձել միության` ՄԱԿ-ի գլխավոր մարմիններից մեկին` ՄԱԿ-ի Տնտեսական ու սոցիալական խորհրդին, անդամակցելը: Այն կներկայացվի որպես Ուկրաինայի առաջին հասարակական կազմակերպություն:

Պատմություն ու մշակույթ

Տարվա ընթացքում անցկացվել են միջոցառումներ` ուղղված Ուկրաինայի հայկական մշակութային ժառանգության պահպանմանն ու տարածմանը: Ուկրաինայի հայերի միության նախագահ Վիլեն Շատվորյանը նախաձեռնել է Կիեւում կինոռեժիսոր Սերգեյ Փարաջանովին նվիրված հուշարձանի տեղադրումը: Տարբեր քաղաքներում կազմակերպվել են ցուցահանդեսներ ու դասախոսություններ, լրատվամիջոցներում բազմաթիվ հրապարակումներ են լույս տեսել եւ այլն:

Ուկրաինայի տարբեր անկյուններում հայկական 33 տաճարներ ու պաշտամունքային ճարտարապետական կառույցներ լայնորեն ներկայացվելու են պատմության ու մշակույթի սիրահարներին: Մի քանի շրջաններում բացվել են խաչքարեր ու հուշատախտակներ: Տեղի են ունեցել ֆիլմերի ցուցադրություններ եւ այլն:

Սպորտ

Հատուկ ուշադրություն է դարձվել երիտասարդ հայ մարզիկների աջակցությանը, Ուկրաինայում սպորտի զարգացմանը, մրցաշարերի եւ մրցույթների կազմակերպմանը՝ Ուկրաինայի հայերի միության հովանու ներքո:

Ուկրաինայի հայերի միության մարզադպրոցի սաներն արդեն երկրորդ տարին է ուրախացնում են տարբեր մրցույթներում իրենց ձեռքբերումներով: Նրանց մեջ արդեն կան երեք սպորտի վարպետ, սպորտի վարպետի երկու թեկնածու, ինչպես նաեւ առաջին տարակարգիկներ:

Վերակազմակերպում

Ուկրաինայի հայերի միությունը Ուկրաինայի արդարադատության նախարարությունում առանցքային փոփոխություններ է հաստատել կազմակերպության կանոնակարգում, ինչպես նաեւ երկրի 24 շրջաններում ներկայացուցչություններ գրանցել:

Ուսումնասիրություններ

Ղրիմում գործում է գիտահետազոտական կենտրոն, որտեղ մասնագետները պատմաիրավական ուսումնասիրություններ են կատարում: Ստեղծվել է «Ղրիմի հայրենադարձների՝ հայերի, բուլղարացիների, հույների եւ գերմանացիների միություն» (նախագահ՝ Վաղարշակ Մելքոնյան): Բացի այդ, նոր խթան է ստացել Ուկրաինայի հայերի միության փորձագիտական խորհուրդը:

Երիտասարդություն

Ուկրաինայի հայ երիտասարդության միությունը հայ երիտասարդության համախմբմանն ուղղված մի շարք միջոցառումներ է անցկացրել: Կազմակերպվել են փառատոներ, ինտելեկտուալ խաղեր, թրենինգներ, գիտաժողովներ, համերգներ, կլոր սեղաններ:

Օգոստոսին կազմակերպվել է  «Ուկրաինայի հայերի միության ամառային մանկապատանեկան ճամբար-2013», որտեղ ուկրաինահայ երեխաներից բացի հանգստացել է Հայաստանից գնացած երիտասարդների խումբը: Դեկտեմբերին երիտասարդական կազմակերպությունների ղեկավարների եւ ակտիվիստների համար ձմեռային ճամբար է կազմակերպվել:

Հայաստան-Ուկրաինա

Ուկրաինայի հայերի միությունն առավելագույնս նպաստել է Ուկրաինայի եւ Հայաստանի միջեւ անհատական եւ ստեղծագործական շփումներին: Հայրենիքի հետ կապերի աշխուժացման համար համագործակցություն է սկսվել «ՅՈՒՏէյր» ավիաընկերության հետ:

2013 թվականը հարուստ էր տարատեսակ ձեռնարկումներով, շրջաններում հայկական եկեղեցիների եւ հուշարձանների կառուցման որոշումներ են կայացվել, ստեղծվել են հայկական լրատվամիջոցներ, կրթական կենտրոններ եւ այլն: Այս ամենի մասին առավել մանրամասն կարելի է տեղեկանալ Ուկրաինայի հայերի միության կայքից, ինչպես նաեւ տեղեկատվական գործընկերների կայքերից:

http://news.am