Ֆրանսահայ նշանավոր երգիչ, Հայաստանի Հանրապետության ազգային հերոս, Շվեյցարիայում ՀՀ դեսպան Շառլ Ազնավուրի մահվան կապակցությամբ տարբեր երկրների հեռուստաալիքներ փոխում են իրենց ծրագրերը,  տարբեր երկրներում կազմակերպվում են հիշատակի արարողություններ։

Panorama.am-ը հետաքրքրվեց ՀՀ մշակույթի նախարարությունից՝ արդյո՞ք  աշխարհահռչակ երգչին նվիրված միջոցառում կազմակերպվելու է Հայաստանում։

Մշակույթի նախարարի մամուլի քարտուղար Անի Սմբատյանը տեղեկացրեց, որ Ալեքսանդր Սպենդիարյանի անվան օպերայի և բալետի ազգային ակադեմիական թատրոնում տեղի է ունենալու ֆրանսահայ նշանավոր երգիչ Շառլ Ազնավուրին նվիրված հուշ երեկո։ Ընթացքի մեջ են նախապատրաստական աշխատանքները։ Այլ մանրամասներ կհայտնեն առաջիկայում։

Նշենք, որ Ելիսեյան պալատը դիտարկում է Երևանում հոկտեմբերին կազմակերպել միջոցառում, որի շրջանակում հարգանքի տուրք կմատուցվի Շառլ Ազնավուրի հիշատակին։ Միջոցառումը կարող է անցկացվել Երևանում հոկտեմբերի 11-12-ին կայանալիք Ֆրանկոֆոնիայի Միջազգային կազմակերպության գագաթնաժողովի շրջանակում, որին ներկա կլինի Ֆրանսիայի նախագահ Էմանուել Մակրոնը։

Հիշեցնենք, որ Շ.Ազնավուրը մահացել է հոկտեմբերի 1-ին։ 94-ամյա շանսոնյեն իր կարիեայի ընթացքում ձայնագրել է ավելի քան 1000 երգ, թողարկել շուրջ 100 ալբոմ։