Ապրիլյան պատերազմում զոհված զինծառայող Ազատ Սիմոնյանի եղբոր՝ Արթուր Սիմոնյանի ծնվելու լուրն անտարբեր չի թողել ոչ ոքի:

Yerkir.am-ի հետ զրույցում Ազատի քույրը՝ Հռիփսիմեն պատմեց, որ երեկ գիշեր հիվանդանոց են այցելել ապրիլյան պատերազմում զոհված այլ զինծառայողների ծնողներ՝ իրենց ընտանիքի հետ կիսելու ուրախությունը:

«Զոհված տանկիստ Նորիկ Գասպարյանի մայրն իմացել էր, որ Ազատին եղբայր է ծնվել՝ միանգամից եկել էին հիվանդանոց, մենք իրենց չէինք ճանաչում, հաճելի էր իրենց այցը, ծանոթ-անծանոթ եկել էին մեզ շնորհավորելու»,-ասաց Հռիփսիմեն:

Նշենք, որ Ազատ Սիմոնյանը երկու քույր ուներ: Արթուրը ծնվել է մյուս քրոջ՝ Ջեմմայի ծննդյան օրը:

«Չէնք համակերպվում, որ մնացել էինք երկու քուրիկով, Ազատը մեր հանդեպ շատ ուշադիր էր, հիմի էլ մենք պետք է ուշադիր լինենք Արթուրի հանդեպ, մինչև իրեն մեծացնենք»,-ասաց նա: Մեզ հետ զրույցում Ազատի հայրը հայտնեց, որ նորածին որդին նման է Ազատին, իսկ երեխայի անունն ընտրել են քույրերը:

«Մի բան կփոխի երևի երեխան, Ազատն իր տեղն ուներ, Արթուրն էլ իր տեղը կունենա, ինչ-որ բան կփոխվի երևի…»,-ասաց Ազատի հայրը՝ Քաջիկ Սիմոնյանը:

Հիշեցնենք, որ ապրիլյան պատերազմի հերոս, ժամկետային զինծառայող Ազատ Սիմոնյանը Կոտայքի մարզի Կամարիս գյուղից էր: