Հետաքրքրություն ներկայացնող հարցերի քննարկման համար արդեն բարի ավանդույթ է դարձել տարեսկզբին Նիդերլանդների Թագավորությունում ՀՀ դեսպանի և հյուպատոսի հանդիպումը հոլանդահայ կազմակերպությունների և կառույցների անդամների հետ:

Ինչպես «Հայերն այսօր»-ին տեղեկացնում է «Նիդերլանդական օրագիր»-ը, Դեսպան Ձյունիկ Աղաջանյանը մանրամասը ներկայացրել է Հայաստանի Անկախության և Հայկական բանակի կազմավորման 25-ամյա հոբելյանական տարվա արդյունքները, Սփյուռքի նախարարության կողմից 2017թ. Հայաստանում կազմակերպվող միջոցառումների թեմատիկան,  Հայաստան-սփյուռք կապը նոր հիմքերի վրա դնելու խնդիրները, կրթական ծրագրերին առնչվող հարցերը:

Այս ֆոնին կարևորվում է Նիդերլանդների և Հայաստանի դիվանագիտական հարաբերությունների հաստատման 25-ամյակը, որը նշվելու է այս տարի: Հարուստ մշակութային  ժառանգություն  ունեցող մեր երկու երկրների միջև  հաջողությամբ զարգանում են հոգևոր, մշակութային կապերն ու շփումները: Լավ նախադրյալներ են ստեղծվել քաղաքական և  բիզնես դաշտերի փոխհամաձայնեցված գործունեության համար:

Հոլանդահայ կազմակերպությունների ու կառույցների ներկայացուցիչներն անդրադարձան համայնքներում կազմակերպվող միջոցառումներին:
Հայկական համայնքները այս տարի ևս հետամուտ են լինելու  Հայոց ցեղասպանության տարելիցի պատշաճ անցկացմանն ու ցեղասպանության ժխտման կանխարգելմանը:

Ի դեպ, հանդիպման մասնակիցները դիտեցին այս թեմայով դեսպանատանը  բացված հայկական կիրակնօրյա դպրոցի սաների աշխատանքների ցուցահանդեսը, գնահատեցին լավագույն աշխատանքները: