Կիեւում Եվրատեսիլի մեկնարկից առաջ նկարչուհի Մարինա Սարգսյանի հեղինակած՝ 2.5 մետր բարձրությամբ նկարազարդված ափսեները կտեղադրվեն մրցույթի ֆան-գոտում: Այս մասին գրում է Analitika.ua-ն:

Նկարչուհու խոսքով՝ յուրաքանչյուր ափսեն նկարազարդելու համար շուրջ երեք օր է պահանջվել:

«Ծրագրվում է, որ Եվրատեսիլի նախաշեմին մրցույթի մասնակից 44 երկրներից յուրաքանչյուրը իր ափսեն է պատրաստելու: Դրանց տեսանելի հատվածը կազմված է լինելու դրոշից, զինանշանից, երկրի ճանաչելի բնապատկերից: Առայժմ մտածում եմ, թե որ երկիրն ընտրեմ, ուզում եմ երկու ափսե նկարազարդել՝ Ուկրաինայի եւ Հայաստանի համար»,- նշել է Մարինա Սարգսյանը:

Սեպտեմբերի 9-ին հայտնի է դարձել, որ Եվրատեսիլ 2017-ի կազմակերպման եւ անցկացման կազմկոմիտեն Կիեւը երգի մրցույթի անցկացման քաղաք է կոչել:

Ուկրաինան 2017 թվականի Եվրատեսիլը հյուրընկալելու իրավունք ստացել է Ստոքհոլմում կայացած մրցույթի ժամանակ երգչուհի Ջամալայի հաղթանակի արդյունքում: