Այսօր շուրջ կես տարվա ընդմիջումից հետո վերսկսվեց հայկական ավիաընկերութան կողմից Երևան-Մոսկվա և հակառակ ուղղությունով չվերթների իրականացումը: «Արմենիա» ավիաընկերության առաջին ինքնաթիռը Երևանի «Զվարթնոց» օդանավակայանից Մոսկվայի «Վնուկովո» օդանավակայան մեկնեց Երևանի ժամանակով 10:15-ին:

Լրագրողների հետ ճեպազրույցում «Արմենիա» ավիաընկերության գլխավոր տնօրեն Ռոբերտ Օգանեսյանը հայտնեց, որ չվերթները սպասարկող անձնակազմի բոլոր անդամները փորձառու կադրեր են և նրանց հիմնական մասը «Արմավիա» և «Էյր Արմենիա» ավիաընկերությունների նախկին աշխատակիցներ են:

«Արմենիա» ավիաընկերությունն այս ուղղությամբ չվերթներ կիրականացնի ամեն օր՝ օրական մեկ անգամ: Չվերթներն իրականացվելու են Boeing 737-500 տիպի ինքնաթիռներով՝ նախատեսված 126 և 110 ուղևորների համար:

Ընկերության գլխավոր տնօրենը հայտնեց, որ պահանջարկի մեծացման դեպքում չվերթների քանակը կավելացվի: Նա նկատեց, որ որքան շուտ քաղաքացիներն ամրագրեն տոմսերն, այնքան ավելի մատչելի կլինի:

Yerkir.am-ի հետ զրույցում «Արմենիա» ավիաընկերությունից օգտված քաղաքացիները նշեցին, որ իրենց համար կարևոր է նախևառաջ անվտանգ թռիչքների իրականացումն ու սպասարկումն, իսկ այն, որ թռիչքներ է իրականացնում հայկական ավիաընկերությունը՝ կարևոր ու ողջունելի հանգամանք է:

ՌԴ-ում ՀՀ դեսպանության դեսպանորդ Վարդան Հակոբյանը Մոսկվայում լրագրողների հետ զրույցում կարևորելով Մոսկվա-Երևան և հակառակ ուղղությունով չվերթների վերսկսումը, նկատեց, որ այն հնարավորություն կտա մեր հայրենակիցներին օգտվելու առավել հարմար տարբերակից: Նա հույս հայտնեց, որ կընդլայնվի «Արմենիայի» չվերթների ցանկը և ընկերությունն իր հաստատուն տեղը կունենա միջազգային ավիաընկերությունների շարքում: