Արցախի ազգային վիճակախաղի Երևանի գրասենյակը հունվարի 27-­ին Երևանի պետական համալսարանում կազմակերպել էր վիճակախաղի շահումների հանձման արարողություն: Ազգային վիճակախաղի 2015 թ. արդյունքներով Հայաստանում խաղարկությանը մասնակցել է 50 հազար տոմս, որից երկու հարյուրը գտել են իրենց շահողներին:

«Արմենպրես»-­ի հաղորդմամբ՝ լրագրողների հետ զրույցում այս մասին ասաց Արցախի ազգային վիճակախաղի Երևանի գրասենյակի տնօրեն Ազատուհի Սիմոնյանը: «Արդեն 3­րդ օրն է , որ Երևանում կատարվում է շահումների բաշխումը և այն կրում է շարունակական բնույթ: Քանի որ ԵՊՀ­ ն մեր մշտական գործընկերներից է և վիճակախաղի մեկնարկից մինչև օրս մեզ աջակցել է, այդ պատճառով էլ այստեղ է կատարվում վիճակախաղի մրցանակների հանձման արարողությունը: ԵՊՀ­ն գնելով տոմսեր նվիրել է ուսանողներին, նրանցից 10-­ն էլ վիճակահանության արդյունքներով շահել են մրցանակներ»,­ ասաց Սիմոնյանը՝ հավելելով, որ շահումային ֆոնդում ներառված են «Արտադրված է Արցախում» տարբերանիշը կրող շահումներ` արցախյան ավանդական գորգեր, թթի օղի տակառիկով և հուշանվերներ:

ԼՂՀ փոխվարչապետ Արթուր Աղաբեկյանը նշեց, որ վիճակախաղի թողարկման առաջին տարում կարծիք կար, որ Հայաստանում և Արցախում պետական վիճակախաղի ընկալման խնդիր կառաջանա, բայց այսօր մեր հասարակությունը գիտի, թե ինչ է նշանակում պետական վիճակախաղ: «Վիճակախաղն այն հեշտ փող աշխատելու միջոցն է, որը պետությունը պարտավոր է պահել, որպես իր սեփականություն: Ազգային վիճակախաղի անցկացման առաջին հիմնական նպատակը, որը մենք որդեգրել էինք, այն էր, որ վիճակախաղի ռեսուրսներն ուղղորդեինք աշխատատեղերի ստեղծմանը, այն էլ կանանց համար»,­ ասաց փոխվարչապետն՝ ընդգգծելով, որ Արցախի ազգային վիճակախաղի անցկացման շնորհիվ այսօր Արցախում միայն 201 կին ամբողջ տարին գորգ է գործում վիճակախաղի պատվերը կատարելու համար:

Վիճակախաղի անցկացման հաջորդ նպատակն, ըստ փոխվարչապետի, ազգային վիճակախաղի անցկացման ռազմավարական ծրագրերի իրագործումն էր: Այս տարիների ընթացքում թիվ մեկ նպատակը վերաբնակեցման ծրագիրն է: Ծրագրի հիմքում էլ Իշխանաձոր համայնքի վերաբնակեցումն է: ԵՊՀ ռեկտոր Արամ Սիմոնյանն ասաց, որ ԵՊՀ-­ում վիճակահանության իրականացման համար մի քանի ուղղություններով են աշխատանքներ տարվել: Դրանցից առաջինը ԵՊՀ ուսանողներին և աշխատակիցներին Արցախ այցելելու հնարավորությունն էր:

«Մեր առանձին աշխատակիցներն առանձին աշխատանքներ են տանում նաև Իշխանաձոր համայնքում՝ դպրոցների, երիտասարդության հետ, ճիշտ է փոքր, բայց, իմ կարծիքով, կարևոր ծրագրեր: Հաջորդ հանգամանքն այն է, որ ԵՊՀ­ն պատրաստակամ է նաև իր ուժերի ներածին չափով ներդրումներ անել այլ ծրագրերի զարգացման ու նոր աշխատատեղերի ստեղծման համար: Մենք մեր գործով գիտակցում ենք, որ օգուտ ենք բերելու ընդհանուր գործին»,­ նշեց ռեկտորը:

Արցախի ազգային վիճակախաղը հիմնադրվել է 2014 թ. ԼՂՀ կառավարության կողմից: Վիճակախաղի նպատակն է կանանց համար աշխատատեղերի ապահովումը, «Արտադրված է Հայաստանում» տարբերանշանով արտադրատեսակների զարգացումն ու տարածումը, ինչպես նաև Արցախում վերաբնակեցման քաղաքականությանն աջակցելը: