«Հայերն այսօրի» զրուցակիցը ՀՀ սփյուռքի  նախարարության, Ռուսաստանի  հայերի  միության,  Գալուստ Կյուլպենկյան»  հիմնարկության  և Նիժնի Նովգորոդի  «Իմաստ»   երիտասարդական  ընկերակցության  կողմից  համատեղ կազմակերպված  Հայաստանի,  Արցախի  և Սփյուռքի  հայկական   երիտասարդական կազմակերպությունների  ղեկավարների  և ներկայացուցիչների  երկրորդ՝  «Ապագա» խորագրով  համաժողովի մասնակից, ռուսաստանաբնակ Վարուժան Գեղամյանն է: Վերջինս Սանկտ Պետերբուրգի «Նոր սերունդ» հայկական երիտասարդական կազմակերպության անդամ է.

– Մեր կազմակերպությունը Սանկտ Պետերբուրգի Հայ Առաքելական Եկեղեցուն և Հայկական ազգային մշակութային միությանը կից է գործում: Այնտեղ ես հայագիտական ծրագրեր եմ մշակում:

Երկար տարիներ գործունեություն ծավալելուց հետո այն եզրահանգմանը եկանք, որ պետք է լեզվի պահպանման համար ռազմավարություն մշակել: Այդ նպատակով հատուկ մեթոդով ենք դասընթացները կազմակերպում. հայերենը որպես օտար լեզու ենք դասավանդում:

Այս մեթոդի կիրառումն իր ցանկալի արդյունքը տվեց. դասընթացի մասնակիցների թիվը գնալով աճեց, որոնց մեջ զգալի թիվ են կազմում այլազգիները: Դասընթացի մասնակիցներին Հայաստանի մասին պատմական ակնարկներ ենք ներկայացնում՝ ազգագրություն, մշակութային արժեքներ, ազգային ավանդույթներ բաժիններով:

Միայն այս տարի 180 հայտադիմում ունեինք, որոնցից 50-ը՝ ոչ հայեր էին ներկայացրել:

Դասընթացի մասնակիցներից այլազգի մի աղջիկ, Հայաստանի մասին տեղեկություններ ստանալով, պարզապես սիրահարվել է մեր երկրին և որոշել է ընտանիքով տեղափոխվել Հայաստան: Ունենք նաև հայազագի 6 սաներ, ովքեր մեզ հետ  աշխատելուց հետո, հայրենադարձվել են: Այլ կերպ ասած՝ մեր դասընթացները խթանում են հայրենադարձությանը:

Մեծ հույսով եմ մասնակցել «Ապագա» խորագիրը կրող երիտասարդական  համաժողովին: Կարծում եմ՝ միասնական ուժերով կկարողանանք զգալի արդյունքի հասնել:

Ես այն համոզմունքն ունեմ, որ ցանկացած գաղափար իրականացնելիս անհրաժշտ է այնպես անել, որ այն հայաստանակենտրոն լինի: Առանց Հայաստանի և Հայոց պետականության զորակցության՝ Սփյուռքը կյանք չունի: Եթե երիտասարդներս որևէ բան անելու ուժ ու եռանդ ունենք, ապա այն միայն ի շահ Հայրենիքի պետք է կյանքի կոչենք: