Ռուսաստանն արդեն տեղակայել է Սիրիայում նորագույն С-400 զենիթահրթիռային համակարգը, որը դեռ նմանը չունի աշխարհում, panarmenian.net-ի փոխանցմամբ՝ հայտնում է ՌԻԱ Նովոստին:

Նոյեմբերի 25-ին հայտնի դարձավ, որ ՌԴ պաշտպանության նախարարությունը Սիրիայի Հմեյմիմ ավիաբազա կուղարկի С-400 նորագույն զենիթահրթիռային համակարգեր:

24 ժամվա ընթացքում զենիթահրթիռային համակարգը ռազմատրանսպորտային ավիացիայով տեղափոխվել է Սիրիա Մերձմոսկովյան տարածաշրջանից, գործակալությանն է հայտնել ՌԴ ռազմատիեզերական զորքերի ներկայացուցիչը:

С-400 համակարգը «Մոսկվա» հրթիռային հածանավի «Ֆորտ» համալիրի հետ միասին կապահովի ռուսական ավիախմբի թռիչքների անվտանգությունը և կոչնչացնի սպառնալիք ներկայացնող ցանկացած թիրախ:

ՌԴ նախագահի ռազմատեխնիկական գործակցության գծով օգնական Վլադիմիր Կոժինը լրագրողներին ասել է, որ С-400 համակարգը չի վաճառվելու և իր առջև դրված խնդիրները կատարելուց հետո կվերադարձվի Ռուսաստան: