Սեպտեմբերի 24-ի երեկոյան Նոր Ջուղայի ՀՄՄ «Արարատ» միության մարզասրահում  հանդիսությամբ նշվեց Հայաստանի Հանրապետության վերանկախացման 24-րդ տարեդարձը: Այս մասին Նոր Ջուղայից «Հայերն այսօրին» տեղեկացնում է Երանուշ Թահմազյանը:

Տոնակատարությունը, որը կազմակերպվել էր Սպահանի Հայոց թեմի Թեմական խորհրդի նախաձեռնությամբ, մեկնարկեց Իրանի Իսլամական եւ Հայաստանի Հանրապետությունների պետական օրհներգի հոտնկայս ունկնդրությամբ, որից հետո  Թեմական խորհրդի խոսքն ընթերցեց  Քարոլոն Դիլանչյանը: Օրվա առթիվ բանախոսությամբ  հանդես եկավ Իրանի Հանրապետությունում Հայաստանի Հանրապետության արտակարգ եւ լիազոր դեսպան Արտաշես Թումանյանը:

Ելույթների բաժինը եզրափակվեց Սպահանի Հայոց թեմի առաջնորդ Տեր Բաբկեն արքեպիսկոպոս Չարյանի հայրական պատգամով:

Ծրագրի երկրորդ բաժնում ազգային, հեղափոխական ու  ժողովրդական երգերով ելույթ ունեցավ ՀՀ վաստակավոր արտիստ Արսեն Գրիգորյանը (Մրոն): Հանդիսությունը վարեց Մանիա Ղուկասյանը:

Լուսանկարները՝ հեղինակի