Երիտասարդ ռեժիսոր Համլետ Դուլյանի՝ երկու տասնյակից ավելի փառատոնների մասնակցած ու Ցեղասպանությանը նվիրված «Ընկղմում կրակի մեջ» ֆիլմը կներկայացվի հայ հանդիսատեսին, գրում է «Արմենպրես»-ը:

Կաննի միջազգային կինոփառատոնի «Կարճամետրաժ ֆիլմի անկյուն» ծրագրում ցուցադրված կինոնկարն ընդգրկվել է երևանյան «Ոսկե ծիրան» 12-րդ միջազգային կինոփառատոնի՝ Հայոց ցեղասպանությանը նվիրված «Մենք կանք» ծրագրում:

«Սա իմ առաջին պրոֆեսիոնալ ֆիլմն է: Ես շատ էի ցանկանում Ցեղասպանության թեմայով ֆիլմ նկարահանել: Ինձ ասում էին՝ պետք չի, 19 տարեկան ես, բարդ թեմա է քո տարիքի համար: Այս կինոն 17 րոպե է տևում, թուրքերեն է:

Մտածեցի, որ ճիշտ քայլ կլինի, որովհետև դեպքերը տեղի են ունենում Օսմանյան կայսրությունում: Գլխավոր հերոսը թուրք զինվոր է,-նշել է Համլետ Դուլյանը:

Երիտասարդ ռեժիսորի խոսքով՝ իր ֆիլմի հերոսը՝ Այդինը, պայքարում է ինքն իր դեմ, որպեսզի սպանի իր ծանոթ հայ ընտանիքին: «Ես չէի ցանկանում նկարահանել քարոզչական ֆիլմ, ուզում էի պատմություն ցույց տալ, որպեսզի դիտողն ինքն իր համար ընտրություն կատարի: Մարդկային պատմություն եմ ցանկացել նկարահանել, ինձ համար շատ կարևոր ֆիլմ է, շատ եմ աշխատել սցենարի վրա»,-նշել է նա: Համլետ Դուլյանի խոսքով՝ իր նախնիները գաղթականներ են Վանից և Մուշից:

«Իմ հոգին պահանջում էր նման ֆիլմ: Ֆիլմը 20 կինոփառատոնների է մասնակցել ՌԴ-ում, Կաննում է 2013-ին ներկայացվել: Հիմնականում դրական արձագանքների է արժանացել»,-ասել է նա: