ԼՂՀ մշակույթի և երիտասարդության հարցերի նախարարությունը հուլիսի 15-21-ը Հադրութի շրջանի Մեծ թաղեր գյուղում  կազմակերպում է  երիտասարդական ճամբար` «Երիտասարդ առաջնորդների ամառային դպրոց» խորագրով:

Ծրագրի  նպատակն է զարգացնել Արցախի երիտասարդների առաջնորդական և կառավարչական հմտությունները, նրանց քաջալերել և առավել ակտիվորեն ներգրավել հանրօգուտ ծրագրերում, զարգացնել գործուն ղեկավար ու կառավարիչ լինելու կարողությունը,  ինչպես նաև  անգլերեն լեզվի իմացությունը: Այն կոչված է ստեղծելու փոխադարձ ճանաչողական դաշտ` երիտասարդությանը երկրի հասարակական-քաղաքական դաշտում ներգրավման և ներհանրապետական նշանակության խնդիրներում ակտիվ մասնակցության ապահովման նպատակով:

Ճամբարին կմասնակցեն  16-22 տարեկան ակտիվ, նախաձեռնող, ստեղծագործ, հանրօգուտ աշխատանքներ կատարելու պատրաստակամ երիտասարդներ: Ծրագիրն իրականացվում է ճամբարի ձևաչափով Մեծ թաղեր գյուղի  Ա. Խանփերյանցի անվան միջնակարգ դպրոցում,  որտեղ մասնակիցները հնարավորություն կունենան ոչ միայն անցնելու ուսուցողական դասընթաց, զարգացնելու անգլերեն լեզվի իմացությունը, այլև անցկացնելու հետաքրքիր ժամանցային միջոցառումներով  հագեցած օրեր:

Ուսուցողական դասընթացն անդրադառնում է այնպիսի թեմաների, ինչպիսիք են արժեհամակարգի վրա հիմնված վարքագիծը /ղեկավարում/, մասնագիտական կոդեքսն ու էթիկան, ուժն ու հեղինակությունը, ընդհանուր խմբի ու փոքր խմբերի արդյունավետությունը: Այս ամենը  նպատակ է հետապնդում զարգացնելու մասնակիցների՝ հաղորդակցվելու, բանակցելու, կազմակերպելու և առաջնորդելու հմտությունները: Համապատասխան թեմաներով կդասախոսի Հայաստանի Ամերիկյան համալսարանի հատուկ դասընթացների բաժնի Հայաստանի մարզերում գործառույթների գծով ղեկավար   Շանթ Պետրոսյանը:

Ծրագիրը իրականացվում է Հայաստանի Ամերիկյան համալսարանի և Հայկական բարեգործական ընդհանուր միության հովանավորությամբ:

«Երիտասարդ առաջնորդների ամառային դպրոց» երիտասարդական ճամբարը կազմակերպվում է ԼՂՀ Մշակույթի և երիտասարդության հարցերի նախարարության «Ոչ ֆորմալ կրթության խթանման ծրագրի» շրջանակներում, որը իրականացվում է ԼՂՀ-ում՝ սկսած 2007 թ-ից:

ԼՂՀ մշակույթի նախարարություն