Շուշիի ազատագրման օրը Արարատ զորամասի համար նշանավորվել է նաև Սուրբ Խաչ մատուռի օրհնությամբ: Սուրբ Մատուռը կառուցվել է Արարատ զորամասի հենակետերից մեկում՝ բոլոր զինծառայողների անշահախնդիր մասնակցությամբ:

Օրհնությունն իրականացվել է Արարատի Սուրբ Հակոբ եկեղեցու հոգևոր հովիվ Տեր Դավիթ քահանա Սահակյանի կողմից՝ մասնակցությամբ զորամասի գնդերեց Նարեկ սարկավագ Պետրոսյանի և ճեմարանի սան Ռոբերտ Զեյնալյանի: Այս մասին «Հայերն այսօր»-ը տեղեկանում է Արարատի Սբ. Հակոբ եկեղեցու ֆեյսբուքյան էջից:

Օրհնությունից հետո Տեր Հայրը դիմել է ներկաներին. «Այսօր հաղթական օր է բոլորիս համար, և այդ կարևոր հաղթանակը ձեռք բերվեց Աստծո անմիջական օգնությամբ, իսկ ձեր կյանքում այս օրը կդաջվի նաև՝ որպես ձեր ձեռքերով վեր հառնված մատուռի օրհնության օր»:

Նա կոչ է արել  նաև հետևել մեր քաջ նախնյաց ավանդույթներին` ձևավորել քրիստոնյա ու անվախ զինվորականի կերպար և դառնալ վերջիններիս արժանի հետևորդներն ու ժառանգները:  Մարտական դիրքը պաշտպանող զինծառայողների կողմից կազմակերպվել էր նաև մատաղ և փոքրիկ հյուրասիրություն: