Աշխարհի առաջատար ԲՈՒՀ-երի ուսանողների, շրջանավարտների և երիտասարդ գիտնականների «Հայաստան. Ստեղծենք միասին» առաջին երիտասարդական հավաքի շրջանակներում «Բժշկություն և առողջապահություն» աշխատանքային խումբը հուլիսի 12-ին իր աշխատանքային օրն սկսեց Հայոց ցեղասպանության զոհերի հուշահամալիր այցելությամբ, այնուհետև խումբը շրջեց Հայոց ցեղասպանության թանգարան-ինստիտուտում,  որից հետո հերթական հանդիպումը կայացավ «Վարդանանց» բժշկական կենտրոնում:

Կենտրոնի  տնօրենի տեղակալ, մանկաբույժ  Նարինե Գրիգորյանի ղեկավարությամբ  խմբի 4 մասնակիցներ՝ Երևանի Մ. Հերացու անվան պետական բժշկական համալսարանի ուսանողներ, քննարկեցին հեռահար բժշկության շրջանակի ընդլայնմանը վերաբերող հարցեր, ծանոթացան համակարգչային ծրագրերին և ինտերակտիվ համացանցային կայքերին, այնուհետև հեռակապով միացան Լոռու մարզի Գարգար գյուղ մեկնած աշխատանքային խմբի մյուս անդամների հետ: Նպատակային գլխավոր աշխատանքը Գարգարում գտնվող աշխատանքային  խմբի իրենց ընկերներից  տեղի հիվանդների մասին ուղարկվող տեղեկատվությունն է,  որի համաձայն, հիվանդները, իրենց ունեցած առողջական խնդիրներին համապատասխան՝ կդասակարգվեն ըստ հիվանդության ծանրության աստիճանների,  հիվանդները կախտորոշվեն և որոշում կկայացվի, թե որտեղ պետք է նրանք ստանան իենց բուժումը: Անհրաժեշտության դեպքում նրանց կհետազոտեն  «Վարդանանց» բժշկական կենտրոնում:

Աշխատանքային խմբի բոլոր անդամները սիրով ու պատրաստակամությամբ կատարում էին իրենց վստահված աշխատանքը, որն իրենց մասնագիտական կրթության ավարտից հետո, անշուշտ, աշխատանքային կենսագրության հիմնաքարերից մեկը կդառնա: