«Հայաստան» համահայկական հիմնադրամի Ֆրանսիայի տեղական մարմնի հովանավորությամբ՝ Լեռնային Ղարաբաղի Կյուրաթաղ (Հադրութի շրջան), Գետավան (Մարտակերտի շրջան) եւ Սարգսաշեն (Մարտունու շրջան) գյուղերում մեկնարկել են համայնքային կենտրոնների կառուցման աշխատանքները:

«Հայաստան» համահայկական հիմնադրամի հասարակայնության հետ կապերի բաժնի փոխանցմամբ՝ ծրագրերը համաֆինանսավորվում են ԼՂՀ կառավարության կողմից: Այս համայնքների բնակիչները` շուրջ 1030 մարդ, հիմնականում զբաղվում են հողագործությամբ եւ անասնապահությամբ:

Մեկ հարկի տակ բուժկետի, գրադարանի, հանդիսասրահի ու գյուղապետարանի կենտրոնացումը նպատակ ունի արդյունավետ դարձնել այս ենթակառուցվածքների շահագործումն ու տնտեսվարումը:

Շնորհակալություն հայտնելով Ֆրանսիայի մեր հայրենակիցներին` համայնքների ղեկավարները հավաստել են, որ այս ձեռնարկն արդեն իսկ ոգեւորել է բնակիչներին:

«Մեր նախաձեռնություններով հայ գյուղացուն սատարելը, լինի դա Հայաստանում, թե Արցախում, մեր հիմնական ուղղությունն է եւ առաջնահերթությունը»,- ասել է «Հայաստան»  հիմնադրամի գործադիր տնօրեն Արա Վարդանյանը: