Պաշտօնական այցով Հայաստանի Հանրապետութիւն ժամանած Իրաքի Հանրապետութեանփոխադրամիջոցի նախարար Բաքիր Ճապեր Ալ-զուպաիտին այցելեց Ծիծեռնակաբերդ` Հայոց ցեղասպանութեան զոհերու յուշահամալիր, այս մասին կը յայտնէ  armeniangenocide100.org-ը:

Իրաքի Հանրապետութեան փոխադրամիջոցի նախարարը ծաղկեպսակ դրաւ Մեծ եղեռնի զոհերու յուշարձանին: Իրաքէն ժամանած հիւրերը եղան ցեղասպանութեան զոհերու յիշատակը յաւէրժացնող անմար կրակի մօտ եւ մէկ րոպէ լռութեամբ յարգեցին անմեղ զոհերու յիշատակը:

Պատուիրակութեան կ’ուղեկցէր Հայոց ցեղասպանութեան թանգարան-ինստիտուտի փոխտնօրէն Սուրէն Մանուկեանը, որ հիւրերուն ներկայացուց յուշահամալիրի կառուցման պատմութիւնը:

Իրաքի պատուիրակութեան անդամները այցելեցին նաեւ Հայոց ցեղասպանութեան թանգարանի ժամանակաւոր ցուցադրութիւններու սրահը, ուր ծանօթացան Հայոց ցեղասպանութեան մասին պատմող ժամանակաւոր ցուցադրութեան: