Թրքական լրատուամիջոցները ՀՀ նախագահին կողմէ Ազգային ժողովէն հայ-­թրքական արձանագրութիւնները յետս կանչելուն անդրադարձած են հիմնականօրէն առանց մեկնաբանութիւններու:

Ինչպէս կը հաղորդէ «Արմէնփրես»-­ը, մասնաւորապէս, Haber3 լրատուական կայքը, առանց հրապարակելու Ազգային ժողովի նախագահ Գալուստ Սահակեանին ուղղուած նախագահ Սերժ Սարգսեանի նամակը, գրած է, որ ՀՀ նախագահը խորհրդարանէն յետս կանչած է 2009 թուականի Հոկտեմբեր 10-­ին Թուրքիոյ եւ Հայաստանի արտաքին գործոց նախարարներու ստորագրած արձանագրութիւնները: Կայքը յղում կատարած է ՀՀ նախագահի նամակին այն հատուածին, ուր ան խօսած է Թուրքիոյ կողմէ առաջ քաշուած յարաբերութիւններու հաստատման խոչընդոտած նախապայմաններուն:

Թրքական Haberler կայքը արձանագրութիւնները ՀՀ ԱԺ-էն ետ կանչելու մասին լուրը ներկայացուցած է որպէս Թուրքիոյ նախկին նախագահ Ապտուլա Կիւլի մասնակցութեամբ սկսած «ֆութպոլային դիւանագիտութեան» աւարտ:

Թրքական Kanal A Haber կայքը տեղեկութիւնը ներկայացուցած է «Հայաստանէն ցնցում առաջացնող քայլ» վերնագիրով:  Vatan թերթը թեմային անդրադարձած է «Երեւանը յետս կանչեց յարաբերութիւնները կարգաւորող արձանագրութիւնները» վերտառութեամբ:

Որոշ իշխանամէտ կայքեր տեղեկութիւնը ներկայացուցած են այսպէս. «Սարգսեան կարգաւորման գործընթացը թաղեց պատմութեան մէջ»: Իսկ Ankara Haber կայքը, նշելով, թէ Սարգսեան կրկին մեղադրած է Թուրքիան, լուրը ներկայացուցած է «Հայաստանի կողմէ սադրիչ քայլ» զաւեշտալի վերնագիրով: