Մատրիտի մէջ` Փետրուար 11-ին, տեղի  ունեցած է «Արարատի յիշողութիւնը. ամենամոռցուած ցեղասպանութեան 100 տարին» գիրքի շնորհանդէսը:

NEWS.am-ի փոխանցմամբ` հեղինակը  յայտնի գրող, լրագրող,  շարք մը գիրքերու, յօդուածներու եւ հեռուստահաղորդումներու հեղինակ Չաւիէր Մորեթը: 2002-ին իր «Գաղտնի կղզի. Իսլանտա» աշխատութեան համար արժանացած է Մեծ ճանապարհորդներ գրական մրցանակին:

«Արարատի յիշողութիւնը. ամենամոռցուած ցեղասպանութեան 100 տարին» գիրքը բաղկացած է 270 էջէ: Գիրքը զուտ պատմական իրադարձութիւններու շարադրում չէ:

Ճանապարհորդական նշումներու ոճով գրուած պատմութեան մէջ հեղինակը ընթերցողին կը ներկայացնէ իր եւ իր լուսանկարիչ ընկերոջ ճանապարհորդութիւնը Հայաստան եւ Արցախ: Ընդգծելով, որ Հայոց ցեղասպանութեան մասին յիշողութիւններուն կարելի է հանդիպիլ գրեթէ ամէն  հայ ընտանիքի մէջ, հեղինակը իր հիացմունքը յայտնած է առ այն, որ հայ ժողովուրդը, չնայած կրած անմարդկային տառապանքներուն, իր մէջ ուժ գտաւ վերածնունդ ապրելու, կերտելու անկախ պետականութիւն եւ պահպանելու իր հարուստ հոգեւոր ժառանգութիւնը ինչպէս Հայաստանի, այնպէս ալ Սփիւռքի մէջ: Գիրքի վերջաբանին մէջ հեղինակը կը նշէ. «Այո, դժուար է գտնել աշխարհի մէջ մէկ այլ ազգ, որ այդքան ցրուած է, բայց այդչափ միահամուռ եւ արմատներուն կառչած: Ճիշդ կ’ըսեն, որ ուր ալ հայը գտնէ հայուն կը ստեղծէ  նոր Հայաստան մը »,-կ’եզրափակէ հեղինակը: