ՀԱՅ ԲԺՇԿԱԿԱՆ ՀԱՄԱՇԽԱՐՀԱՅԻՆ

ՎԱՐՉՈՒԹԵԱՆ ՆԱԽԱԳԱՀ

ՏՐ. ՃԵՐՐԻ ՄԱՆՈՒԿԵԱՆԻՆ

Յարգելի՛ տր. Մանուկեան,

2015 թուականը մեծ նշանակութիւն ունի համայն հայութեան համար, այս տարի` Հայոց ցեղասպանութեան 100-րդ տարելիցին, վստահ եմ, որ միասնաբար ենք պայքարելու արդարութեան վերականգնման համար, պայքարելու ենք Մեծ եղեռնի հանրահռչակման համար, որպէսզի այլեւս երբեք եւ ոչ մի տեղ այն չկրկնուի: Տարբեր են պայքարի միջոցներն ու ձեւերը, տարբեր են պայքարի ոլորտները, եւ իւրաքանաչիւրս մեր գործունէութեան շրջանակներում պէտք է անենք ամէն ինչ` եւս մէկ անգամ Հայոց ցեղասպանութիւնը հանրահռչակելու համար: Այս պայքարում կարեւոր տեղ ու կշիռ ունի նաեւ հայ բժշիկը եւ բժշկութիւնը, քանզի առողջ լինելը նոյնպէս կարեւոր պայման է ազգային յարատեւութեան համար: Եւրոպական մի շարք երկրներում արդէն կազմակերպուել է խորհրդանշական արեան յանձնում` ի յիշատակ Ցեղասպանութեան զոհերի, առողջապահական ոլորտում յաջորդ քայլը կարող է լինել առողջութեան պահպանման միամսեակը:

2015 թուականի Յուլիսի 2-4-ը Երեւանում կայանալու է «Հայ բժիշկների միջազգային 4-րդ համագումարը»: Առաջարկում ենք Յունիսի 15-Յուլիսի 15-ը կոչել «Առողջութեան միամսեակ», որի շրջանակներում համագումարի մասնակիցները իրենց մասնագիտութեան շրջանակներում կը մատուցեն անվճար բժշկական ծառայութիւններ Հայաստանի մարզերում եւ Երեւանում (2 օր եւ աւելին` ըստ նպատակայարմարութեան): Միամսեակը կ’իրականացուի ՀՀ սփիւռքի եւ առողջապահութեան նախարարութիւնների աջակցութեամբ:

Խնդրում ենք տարածել բժիշկների, կառոյցների շրջանում եւ միասնաբար իրականացնենք այս կարեւոր շարժումը հայրենիքի համար:

Եկէք միասնական լինենք` յանուն ազգի առողջութեան:

Յարգանքով`

ՀՐԱՆՈՅՇ ՅԱԿՈԲԵԱՆ