ԱՐԲԱԶԱ՛Ն ՀԱՅՐ,

ՔԱՂԱՔԱԿԱՆ ԵՒ ԴԻՒԱՆԱԳԻՏԱԿԱՆ ԱՅՐԵՐ,

ՀՀ սփիւռքի նախարարութեան եւ անձամբ իմ անունից ջերմօրէն շնորհաւորում եմ բոլորիս` «Դպրոցասէր» վարժարանի այս հրաշալի մասնաշէնքի բացման առթիւ:

Բարձր գնահատանքի եւ մեծ հիացմունքի է արժանի Փարիզի դպրոցասէր վարժարանի գործունէութիւնը, որն իր գոյութեան տարիներին յաջողութեամբ դիմակայել է ուծացման վտանգին: Վարժարանն իր հարուստ պատմութեամբ եւ կրթական աւանդներով ֆրանսահայութեան ամենահեղինակաւոր հաստատութիւններից մէկն է, որի առաքելութիւնն է զբաղուել մարդակերտումի եւ հայակերտումի սրբազան գործով`  պարգեւելով արաժանաւոր ու կիրթ քաղաքացիներ, ինչպէս նաեւ պատմական հայրենիքին  եւ հայկականութեանը  կապուած հայեր:

«Դպրոցասէր» ազգային վարժարանի տնօրինութեան, ուսուցիչների, հովանաւոր-բարերարների  հայանպաստ, ազգանուէր եւ հայապահպան աշխատանքի շնորհիւ է, որ ընդլայնւում է հաստատութիւնը, աւելանում  նրա նկատմամբ վստահութիւնը:

Սիրելի՛ հայրենակիցներ,

Ապրելով եւ արարելով Հայրենիքից դուրս` ձեր գործունէութեամբ է, որ առաւել ամրանում եւ ջերմանում են հայ-ֆրանսիական բարեկամական յարաբերութիւնները: Մենք հպարտ  ենք, որ ձեր  ազգանուէր գործունէութեամբ կարողանում էք արժանապատուօրէն պահել ձեր ազգային ինքնութիւնը, ոգին, լեզուն եւ մշակոյթը:

Ուզում եմ իմ խորին շնորհակալութիւնը յայտնել այս մասնաշէնքի կառուցումը հովանաւորողներին` բարի կամք, մեծ սիրտ ու ազգային ոգի ունենալու համար:

Թանկագի՛ն հայրենակիցներ, կրկին շնորհաւորում եմ մեզ բոլորիս եւ գտնում, որ այս կառոյցը մի գեղեցիկ նուէր էր Հայոց ցեղասպանութեան 100-րդ տարում եւս մէկ անգամ  ապացուցելու հայի անմահութիւնը:

Լաւագոյն բարեմաղթանքներով,

ՀՐԱՆՈՅՇ ՅԱԿՈԲԵԱՆ