Մարդու իրաւունքներու շաբթուան ծիրէն ներս՝ Ռասիզմի եւ խտրականութեան դէմ պայքարի յանձնաժողովը Սթամպուլի մէջ ձեռնարկ պիտի իրականացնէ “Անատոլիայի մէջ հայկական մշակութային հետքերը” խորագիրով: Այս մասին կը տեղեկացնէ Armenpress.am-ը՝ վկայակոչելով թրքական Evrensel պարբերականը:

Դեկտեմբեր 15-ին կայանալիք ձեռնարկին ելոյթ պիտի ունենայ լրագրող, ճարտարապետ Զաքարիա Միլտանօղլուն: Վերջինս ձեռնարկին մասին ծանուցման մէջ հակիրճ ձեւով պատմած է հայկական թաղամասերու մասին, որոնց այն ժամանակ կ’անուանէին “կէաւուրի թաղամաս”: Ան նշած է, որ թաղամասերը բաղկացած էին վերին, ներքին եւ միջին շրջաններէ եւ պարտադիր այնտեղ եղած է հայկական շուկայ: Միլտանօղլուն ներկայացուցած է, որ 1915 թուականէն առաջ հայերը այս հողերուն վրայ ունէին շուրջ երկու հազար դպրոց եւ երեք հազար եկեղեցի, որոնք կը ներկայացնէին այդ թաղամասերու մշակութային հարստութիւնը: “Եւ երբ կը մտածենք այս ամէնուն մասին, ուղեղի մէջ կու գայ հետեւեալ հարցը. “ի՞նչ պատահեցաւ ասոնց”: Անատոլիայի այս թաղամասերուն մէջ այլեւ հայ չէ մնացած”,- նշած է Միլտանօղլուն: