Լիբանանի հայոց թեմի առաջնորդ Շահէ եպս. Փանոսեանի հովանաւորութեամբ եւ Էշրեֆիէի Ս. Յակոբ եկեղեցւոյ թաղական խորհուրդին կազմակերպութեամբ, Ս. Յակոբ Մծբնացի հայրապետին տօնին առիթով «Աւետաբեր» միջդպրաց դասերու երգչախումբը ներկայացուց սրբազան համերգ մը` խմբավարութեամբ Երուանդ Քէշիշեանի, շաբաթ, 6 դեկտեմբեր 2014-ի երեկոյեան ժամը 8:00-ին, Ս. Յակոբ եկեղեցւոյ «Տիրան Պապիկեան» սրահին մէջ: Այս մասին կը հաղորդէ «Ազդակը»:

Տէրունական աղօթքի քառաձայն երգեցողութեամբ սկսաւ համերգը: Բարի գալուստի խօսքով հանդէս եկաւ Լիզա Կառվանեան: Ան նշեց, որ մշակութային ձեռնարկները միջոցներ են մեր հոգիին մէջ անթեղուած կրակը բոցավառելու եւ մեր երթը շարունակելու հաւատքով ու հայ ազգի արժանիքներով: Ան անդրադարձաւ, թէ ինչպէ՛ս յետեղեռնեան սերունդը յաղթահարելով ամէն դժուարութիւն կառուցեց Ս. Յակոբ եկեղեցին, որ միջնաբերդը եղաւ սերունդներ թրծելու սուրբ հաւատքով եւ հայրենասիրական ոգիով:

Սրբազան համերգը ընդգրկեց հոգեւոր երգեր, շարականներ, ինչպէս նաեւ ժողովրդային- հայրենասիրական երգերու ընտրանի մը:

Յաջորդաբար երգուեցան «Ուրախ լեր»,  «Հրաշափառ Աստուած», «Քրիստոս պատարագեալ», «Հայրապետական մաղթերգ», «Սուրբ-սուրբ» եւ «Տէր, կեցո՛ դու զհայս» շարականները:

Յաջորդաբար Մարալ Ադամեան եւ Երուանդ Քէշիշեան մեներգեցին «Սրբասացութիւն հայրապետաց» եւ «Յաղթող եւ սուրբ հայրապետ» շարականները:

Երգեցողութեան ընթացքին յաջորդաբար ելոյթ ունեցան Վիգէն սրկ. Քիւրքլեան` ներկայացնելով  Ս. Յակոբ հայրապետին կեանքը, Գաբրիէլ սրկ. Եղիայեան` ներկայացնելով Ս. Յակոբ հայրապետին արժէքը մերօրեայ կեանքին մէջ, եւ ապա` Մեսրոպ  քհնյ. Քէրքէզեան` ներկայացնելով «Ս. Յակոբ հայրապետը` հայացած սուրբ» նիւթը:

Զապէլ Աւագեանի մենակատարութեամբ հնչեց «Օրօր»-ը, իսկ Արա Կարէեանի մենակատարութեամբ «Բամբ որոտան» երգը: Գեղեցիկ էր կոմիտասեան ժողովրդական երգերու կատարումը: Երգչախումբը ներկայացուց նաեւ «Ով հայոց աշխարհ», «Զարթիր լաօ» եւ «Երեւան Էրեբունի» հայրենասիրական երգերը:

Աւարտին` օրհնութեան խօսք ուղղեց  Լիբանանի հայոց թեմի առաջնորդ Շահէ եպս. Փանոսեան, որ ջերմօրէն գնահատեց երիտասարդ խմբավարը, երգչախումբին անդամները, իրենց գեղեցիկ ու հոգեպարար երգեցողութեան համար: Ան ըսաւ, որ Ս. Յակոբ եկեղեցւոյ անուանակոչութեան տարեդարձին առիթով պարտաւոր ենք մեր սրբութիւնը գտնելու եկեղեցւոյ մէջ, մեր ժողովուրդը պէտք է ամրանայ հաւատքով եւ սրբութեամբ: Հոգեւոր արժէքներուն նկատմամբ պէտք չէ անտարբեր մնանք, այլ պէտք է վերապրինք կեանքը մեր քրիստոնեայ նախահայրերուն, որոնք կառուցած են այն, ինչ որ մենք ժառանգ ստացած ենք ներկայիս: Իր խօսքի աւարտին ան բարձրօրէն գնահատեց Մեսրոպ քհնյ. Քէրքէզեանը հայ եկեղեցւոյ նկատմամբ իր հաւատարմութեան ու ծառայութեան համար` մաղթելով, որ ան շարունակէ իր առաքելութիւնը Ս. Յակոբ եկեղեցւոյ ծաղկեցման ու պայծառացման մէջ: Համերգին փակումը կատարուեցաւ «Կիլիկիա» երգով: