«Բարձրագոյն կրթութեան ապագան» Պոլոնեան գործընթացի հետազօտողներու համաժողովին մասնակցելու նպատակով Ռումանիոյ մէջ գտնուող ՀՀ կրթութեան եւ գիտութեան նախարար Արմէն Աշոտեան Նոյեմբեր 25-ին ՀՀ դեսպանութեան մէջ հանդիպումներ ունեցաւ Պուխարեստի համալսարանի հայոց լեզուի դասախօս, դոկտոր Այտա Մարկոսեանի եւ միջպետական կրթաթոշակներով Ռումանիոյ  համալսարաններ յաճախող հայ ուսանողներու հետ: Այս մասին կը յայտնեն ԱԳՆ լրատուական ծառայութենէն:

Կարեւոր համարելով հայերէնի ուսուցումը Ռումանիոյ մէջ հայագիտութեան խթանման տեսակէտէն, ինչպէս նաեւ բարձր գնահատելով դոկտոր Այտա Մարկոսեանի ներգրաւուածութիւնը այդ գործին մէջ, մասնաւորապէս ռումանախօսներու համար հայոց լեզուի դասագիրքի հրատարակումը` նախարար Աշոտեան պատրաստակամութիւն յայտնեց այսուհետ եւս շարունակելու աջակցութիւնը հայերէնի դասընթացներուն թէ՛ Պուխարեստի, թէ՛ Կլուժի համալսարաններուն մէջ, որուն ծիրէն ներս այս տարի բացուած է եւ կը գործէ հայագիտութեան ինստիտուտը:

Ուսանողներուն հետ հանդիպման ժամանակ նախարար Աշոտեան ներկայացուց այն գերակայութիւնները, որ Հայաստան կ’ակնկալէ միջպետական կրթական ծրագիրներէն եւ պատասխանեց ուսանողներու հարցերուն:

Երեկոյեան նախարար Աշոտեան այցելեց Պուխարեստի Հայոց կեդրոն եւ հանդիպում ունեցաւ հայ համայնքի ներկայացուցիչներուն հետ, որուն ընթացքին քննարկուեցան կրթական ոլորտի, ուսանողներու փոխանակման, հայերէնի ուսուցման եւ հայագիտութեան զարգացման հետ կապուած հարցեր: