Աշխատանքային այցով Լեռնային Ղարաբաղի Հանրապետութեան մէջ գտնուող ՀՀ նախագահ, ՀՀ զինուած ուժերու գերագոյն գլխաւոր հրամանատար Սերժ Սարգսեան, հայկական երկու հանրապետութիւններու «Միասնութիւն-2014» համատեղ մարտավարական զօրավարժութիւններու ծիրէն ներս, Արցախի հանրապետութեան Նախագահ Բակօ Սահակեանի հետ այսօր առաւօտեան այցելած է առանձին մոտոհրաձգային բաժնի մշտական տեղակայման վայր, արգելագօտիին մէջ դիտած ցուցադրական պարապմունքները:

Այս մասին ինչպէս կը յայտնեն ՀՀ Նախագահի մամլոյ ծառայութենէն, Նախագահները ծաղիկներ դրած են Վազգէն Սարգսեանի յուշարձանին, յարգանքի տուրք մատուցած Արցախի եւ Հայաստանի ազգային հերոսի յիշատակին:

Սերժ Սարգսեան այցելած է նաեւ բանակային բնագիծ, դիտած ստորաբաժանումներու գործողութիւնները, ներկայ գտնուած նոր զօրանոցի ու զինաւանի բացման արարողութիւններուն, ապա խրախուսած ծառայութեան մէջ աչքի ինկած զինծառայողներուն:

Աշխատանքային այցի աւարտին Նախագահ Սերժ Սարգսեան Ստեփանակերտի հանրապետական բժշկական կեդրոնին մէջ ներկայ  գտնուած է անօթագրութեան կեդրոնի բացման: Բժշկական այս կեդրոնին մէջ պիտի կատարուին սրտի եւ մնացած բոլոր անօթներու ստենտաւորումները, պիտի ախտորոշուին եւ բուժուին  անօթային խնդիրներ ունեցողները: